អាមេរិក ៖ មន្ទីរបញ្ចកោណបាននិយាយកាលពីថ្ងៃសៅរ៍ថា សហរដ្ឋអាមេរិកនឹងបញ្ជូនប្រព័ន្ធការពារដែនអាកាសរយៈចម្ងាយខ្ពស់មានសមត្ថភាពខ្លាំង ថាអាត់(THAAD)និងកងវរសេនាតូចប្រព័ន្ធការពារដែនអាកាស ប៉ាទ្រីយ៉ូត (Patriot) បន្ថែមទៀតទៅកាន់មជ្ឈិមបូព៌ា ឆ្លើយតបទៅនឹងការវាយប្រហារនាពេលថ្មីៗនេះលើកងទ័ពអាមេរិកនៅក្នុងតំបន់នេះ។  

សហរដ្ឋអាមេរិកបានបញ្ជូនកម្លាំងទ័ពជើងទឹកយ៉ាងច្រើនទៅកាន់មជ្ឈិមបូព៌ាក្នុងប៉ុន្មានសប្តាហ៍ថ្មីៗនេះ រួមទាំងនាវាផ្ទុកយន្តហោះពីរនាវាជំនួយរបស់ពួកគេនិងកងម៉ារីនប្រហែល ២.០០០ នាក់។

ទីក្រុងវ៉ាស៊ីនតោន កំពុងប្រុងប្រយ័ត្នខ្ពស់ចំពោះសកម្មភាព ដោយក្រុមដែលគាំទ្រដោយអ៊ីរ៉ង់ ខណៈ ភាពតានតឹងក្នុងតំបន់កើនឡើងក្នុងអំឡុងពេលសង្គ្រាមអ៊ីស្រាអែល និងក្រុមហាម៉ាស។

រដ្ឋមន្ត្រីការពារជាតិអាមេរិកលោកឡយ អូស្ទីន(Lloyd Austin)និយាយនៅក្នុងសេចក្តីថ្លែងការណ៍មួយ បន្ទាប់ពីកិច្ចពិភាក្សាលម្អិតជាមួយប្រធានាធិបតី លោកJoe Biden ស្តីពីការកើនឡើងនាពេលថ្មីៗនេះពីសំណាក់ប្រទេសអ៊ីរ៉ង់ និងកងកម្លាំងតំណាងរបស់ខ្លួននៅទូទាំងតំបន់មជ្ឈិមបូព៌ាថា ថ្ងៃនេះខ្ញុំបានដឹកនាំជំហានបន្ថែមមួយចំនួនដើម្បីពង្រឹងឥរិយាបថរបស់ក្រសួងការពារជាតិនៅក្នុងតំបន់។    

លោក Austin បាននិយាយថា លោកកំពុងដាក់ទាហានបន្ថែមលើការបញ្ជាឱ្យត្រៀមខ្លួនក្នុងការដាក់ពង្រាយកម្លាំង ប៉ុន្តែពុំបានបញ្ជាក់ថាមានចំនួនប៉ុន្មានទេ។ មន្ទីរបញ្ចកោណបានដាក់ទាហានប្រហែល ២.០០០ នាក់ រួចហើយ ជាការត្រៀមខ្លួនជាស្រេចក្នុងករណី ត្រូវការដាក់ពង្រាយទៅកាន់តំបន់នេះ ។

ក្រសួងសុខាភិបាលតំបន់ហ្កាហ្សា បាននិយាយកាលពីថ្ងៃសៅរ៍ថា ការវាយប្រហារតាមអាកាសនិងមីស៊ីល របស់អ៊ីស្រាអែល បានសម្លាប់ជនជាតិប៉ាឡេស្ទីន យ៉ាងហោចណាស់ ៤.៣៨៥នាក់ រួមទាំងកុមាររាប់រយនាក់ ហើយមនុស្សជាង១លាននាក់ ក្នុងចំណោមប្រជាជន២.៣លាននាក់ ក្នុងដែនដីដ៏តូចមួយនេះ បានជម្លៀសខ្លួន៕