ភ្នំពេញ ៖ យោងតាមមជ្ឈមណ្ឌលសកម្មភាពកំចាត់មីនកម្ពុជាបានឲ្យដឹងថា នៅវេលាថ្ងៃអាទិត្យទី២២ ខែ តុលា ឆ្នាំ២០២៣ នេះ គម្រោងសមាហរណកម្ម បោសសម្អាតមីន និងជួយ សង្គ្រោះជនរងគ្រោះដោយសារគ្រាប់មីនបានទទួលដំណើរទស្សកិច្ចស្វែងយល់ពីសកម្មភាពគម្រោង របស់គណប្រតិភូ ប្រទេសអាមេនី ស្ថិតនៅភូមិ អូរកន្ធៀងវ៉ា ឃុំ ស្ទឹងត្រង់ ស្រុកសាលាក្រៅ ខេត្តប៉ៃលិន។

 ក្រុមប្រតិភូនៃប្រទេសអាមេនី បានស្តាប់នូវបទបង្ហាញស្តីពីសកម្មភាពការងាររបស់គម្រោង និង ទស្សនាការប្រមូលផលដំណាំបន្លែរបស់កសិករគំរូដែលបានចូលរួមក្នុងវគ្គហ្វឹកហ្វឺនកសិកម្មបឋម ព្រមទាំងបានទស្សនា សកម្មភាពការងាររបស់គម្រោងជួយគាំទ្រសេដ្ឋកិច្ចសង្គម ដល់ជនពិការដោយសារមីន និង សំណល់ជាតិផ្ទុះពីសង្គ្រាមផងដែរ។

សូមជម្រាបថា បើយោងតាមសេចក្តីជូនដំណឹងរបស់មជ្ឈមណ្ឌលសកម្មភាពកំចាត់មីនកម្ពុជាបានឲ្យដឹងថា នៅ ក្នុងដំណើរទស្សនកិច្ចរបស់ក្រុមប្រតិភូនៃប្រទេសអាមេនីនៅកម្ពុជារយះពេល៤ថ្ងៃ នេះអង្គភាពស៊ីម៉ាក់ទទួលបន្ទុករៀបចំជូនប្រតិភូបានធ្វើទស្សនកិច្ចស្វែងយល់នៅវិទ្យាស្ថានបច្ចេកទេសសកម្មភាពកំចាត់មីនខេត្តកំពង់ឆ្នាំងកាលពីថ្ងៃទី ២០ ខែតុលា២០២៣ ។ ហើយនៅថ្ងៃទី២១ ខែតុលា ប្រតិភូបានបន្តទស្សនកិច្ចនៅទីបញ្ជាការដ្ឋានស៊ីម៉ាក់ ខេត្ត បាត់ដំបង (DU2) និងបន្តចុះទៅពិនិត្យសកម្មភាពបោស សម្អាតមីននៅទីវាល។ នៅថ្ងៃទី ២២ ខែតុលាបន្តធ្វើ ទស្សនកិច្ចស្វែងយល់ពីគម្រោងអភិវឌ្ឍលើដីបោសសម្អាតមីនរួចក្នុងខេត្តប៉ៃលិន។ហើយសម្រាប់នៅថ្ងៃទី២៣ ខែ តុលា ស្អែកនេះ ក្រុមប្រតិភូនៃប្រទេសអាមេនី នឹងធ្វើ ទស្សនកិច្ចសិក្សាស្វែងយល់ពីទីបញ្ជាការស៊ីម៉ាក់ នៅរាជធានីភ្នំពេញ ៕ ដោយ ៖ ភារម្យ​