ភ្នំពេញ ៖ ត្រីមេពូជចម្រុះក្នុងតំបន់អភិរក្សបឹងពារាំង ដែលមានទីតាំងក្នុងសង្កាត់ជ្រាវ ក្រុងសៀមរាប បានងាប់ជា បន្តបន្ទាប់ ដោយសាតែទឹកក្នុងបឹង បានចាប់ផ្ដើមគោករាក់។ សហគមន៍ និងមន្ត្រីជលផល កំពុងស្វះស្វែង រកវិធីជួយសង្គ្រោះ។
ប្រធានសហគមន៍បឹងពារាំង លោក គង់ មង្គល បានឲ្យដឹងថា ត្រីមេពូជ ក្នុងបឹងពារាំង បានចាប់ ផ្តើមងាប់ ចំនួនពីរយប់មកហើយ។ យប់ថ្ងៃទី៣ ខែមិថុនានេះ មានត្រីងាប់តិចតួច តែយប់ថ្ងៃទី៤ ខែមិថុនា នេះ ងាប់រហូតជិត១០០គីឡូក្រាមឯណោះ ដែលមួយយប់ត្រីងាប់ជាង៥០ក្បាល ស្មើជាង៧០គីឡូក្រាម។ កត្តា ដែលធ្វើឱ្យត្រីមេពូជចម្រុះងាប់លឿនបែបនេះ ដោយសារកត្តាអាកាសធាតុក្តៅខ្លាំង ធ្វើឱ្យទឹករីងហួត លឿន។
លោក បានឱ្យដឹងទៀតថា កន្លងមក សហគមន៍បានស្នើសុំខេត្ត និងក្រសួង ជីកជាស្រះក្នុងបឹងនេះ ដើម្បីរក្សាទឹកក្នុងការអភិរក្សត្រីមេពូជ។ តែដោយសាលិខិតដឹកជញ្ជូនអាចម៍ដីចេញមានការយឺតយ៉ាវ ទើប មិនអាចបន្តជីកទៀតកើត ហើយខ្វះទឹកក្នុងការសង្គ្រោះត្រីបែបនេះ។
លោក បានបញ្ជាក់ថា ប្រសិនបើនៅតែបែបនេះ ត្រីមេពូជ និងហ្វូងសត្វស្លាបទឹក អាចបន្តងាប់ថែម ទៀតមិនខាន។ តែលោករំពឹងថា ថ្នាក់ដឹកនាំខេត្ត នឹងជួយពន្លឿនក្នុងការផ្តល់លិខិតដឹកអាចម៍ដីចេញ ដើម្បីបានជីកស្តារបឹងនេះបន្តទៀត។លោក ពត វណ្ណដេត នាយរងផ្នែករដ្ឋបាលជលផលចុងឃ្នៀស បានឱ្យដឹងដែរថា ករណីត្រីមេពូជ ក្នុងបឹងពារាំងងាប់យ៉ាងច្រើននេះ ខាងលោកកំពុងសហការជាមួយសហគមន៍ បូមទឹកពីក្នុងស្រះបញ្ចូល ដើម្បីសង្គ្រោះបឋម។ ក្នុងករណីជួយមិនបាននោះ នឹងសុំគោលការណ៍ពីសាលាក្រុង ប្រើប្រាស់រថយន្ត ដឹកទឹកយកទៅបញ្ចូលថែមទៀត។ បើមិនដូច្នេះទេ ត្រីមេពូជអាចងាប់បន្តរហូតអស់ពីបឹងក៏ថាបាន៕
អត្ថបទ៖ ឈិត សាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
