លោកស្រី ជូលៀត តូម៉ា (Juliette Touma) នាយកផ្នែក​ទំនាក់ទំនង​នៅ​ទីភ្នាក់ងារ​គ្រប់​គ្រង​ជំនួយ និងការងាររបស់អង្គការសហប្រជាជាតិ (UNRWA) បានប្រាប់សារព័ត៌មាន Reuters ក្នុង​តំបន់ហ្កាហ្សាតាមទូរស័ព្ទពីទីក្រុង អាម៉ង់ (Amman) ប្រទេសហ្ស៊កដានី ថា ក្បួន​រថយន្ត​ទីពីរ​ដែល​មា​នរថយន្តដឹកជំនួយចំនួន១៤ គ្រឿងបានឆ្លងកាត់ច្រកព្រំដែនរ៉ាហ្វា (Rafah) ពី​ប្រទេស​អេហ្ស៊ីប​ទៅ​កាន់តំបន់ ហ្កាហ្សា ដែលត្រូវបានឡោមព័ទ្ធ កាលពីយប់ថ្ងៃអាទិត្យ  ។

មុន​ពេលដឹកជំនួយចូលទៅ អ្នកឃើញហេតុការណ៍បានរាយការណ៍ពីការផ្ទុះ និង​ស៊ីរ៉ែន​រថយន្ត​សង្គ្រោះ​បន្ទាន់នៅព្រំដែន។ យោធាអ៊ីស្រាអែលបាននិយាយថា រថក្រោះមួយគ្រឿង​ក្នុង​ចំណោម​រថក្រោះ​របស់​ខ្លួន​បាន​វាយ​ប្រហារ​មូលដ្ឋាន​មួយ​កន្លែង​រប​ស់​អេហ្ស៊ីប​ដោយ​ចៃដន្យ​នៅ​ជិត​ព្រំដែន​ជា​មួយ​ហ្កាហ្សា។ 

អ្នកនាំពាក្យកងទ័ពអេហ្ស៊ីប បាននិយាយថា ឆ្មាំព្រំដែនអេហ្ស៊ីបជាច្រើននាក់បានរងរបួសស្រាល បន្ទាប់ពី​រងការវាយប្រហារដោយបំណែករថក្រោះរបស់អ៊ីស្រាអែល។  អ្នកមើល​ឃើញ​ហេតុការណ៍​ម្នាក់ និងប្រភពវេជ្ជសាស្រ្តបាននិយាយថា មនុស្សចំនួន៧នាក់បានរងរបួស និង​ត្រូវ​បាន​បញ្ជូនទៅកាន់មន្ទីរពេទ្យ។

កងកម្លាំង​ការពារជាតិអ៊ីស្រាអែល បង្ហាញការសោកស្ដាយចំពោះឧបទ្ទវហេតុនេះ ដែលកំពុង​ត្រូវ​បាន​ស៊ើបអង្កេត ។ប្រភពសន្តិសុខ និងមនុស្សធម៌ បាននិយាយថា នៅក្នុងក្បួន​ដឹក​ជំនួយ​កាល​ពី​ថ្ងៃ​អាទិត្យ មានរថយន្តសរុបប្រហែល ១៩ គ្រឿង ដោយផ្ទុកគ្រឿងបរិក្ខារពេទ្យ និងអាហារ។     

ក្បួន​រថយន្តទីមួយ មានចំនួន ២០ គ្រឿងនៃការផ្គត់ផ្គង់ដែលចាំបាច់ខ្លាំង បាន​ចូល​ដល់​តំបន់​ហ្កាហ្សាកា​លពីថ្ងៃសៅរ៍តាមទីក្រុងរ៉ាហ្វា ដែលពីមុន​ត្រូវ​បាន​បិទ​បន្ទាប់​ពី​ការ​ទម្លាក់​គ្រាប់​បែក​បាន​វាយ​ប្រហារ​លើព្រំដែនហ្កាហ្សា និងស្របពេលមានជម្លោះលើលក្ខខណ្ឌសម្រាប់ការផ្តល់ជំនួយ។     

ការ​ចែកចាយការផ្គត់ផ្គង់ទាំងនោះបានចាប់ផ្តើមកាលពីថ្ងៃអាទិត្យ ប៉ុន្តែ​ក្រុម​មន្ត្រី​ជំនួយ​នៅ​តែ​ព្រមាន​ពី​គ្រោះម​ហន្តរាយមនុស្សធម៌ ខណៈការផ្គត់ផ្គង់ស្បៀង ទឹក និងប្រេងឥន្ធនៈ​មាន​កម្រិត​ទាប​នៅ​ឡើយ។

មន្ត្រីអង្គការ​សហប្រជាជាតិបាននិយាយថា ចាំបាច់ត្រូវមានរថយន្តដឹកជំនួយយ៉ាងហោចណាស់ ១០០គ្រឿង ក្នុងមួយថ្ងៃ ចូលទៅក្នុងតំបន់ហ្កាហ្សា ដើម្បីបំពេញតម្រូវការបន្ទាន់។ មុន​ពេល​ផ្ទុះ​ជម្លោះ​ថ្មី​ចុង​ក្រោយនេះ រថយន្ត​ដឹក​ជំនួយ​រាប់​រយ​គ្រឿង​បាន​ទៅដ​ល់តំ​បន់​រង​ការ​ឡោម​ព័ទ្ធ​ជា​រៀង​រាល់ថ្ងៃ​៕