លោកស្រី Lesa Jane GALE អគ្គស្នងការរងទទួលបន្ទុកទំនាក់ទំនងអន្តរជាតិ នៃ​នគរបាល​សហព័ន្ធ​អូស្រ្តាលី បានថ្លែងថា នគរបាលអូស្ត្រាលី បាន​ចាត់​ទុក​អគ្គស្នង​ការដ្ឋាន​នគរបាល​ជាតិ​កម្ពុជា​ គឺជាដៃគូនាំមុខគេក្នុងតំបន់ លើកិច្ច​សហប្រតិបត្តិការ ដើម្បី​ទប់ស្កាត់​រាល់​បទ​ល្មើស​គ្រប់​ប្រភេទ​ ជាពិសេសឧក្រិដ្ឋកម្មឆ្លងដែនតែម្តង។

ការអះអាងរបស់លោកស្រី Lesa Jane GALE នេះគឺបានធ្វើឡើង នៅក្នុង​កិច្ច​ជំនួប​ទ្វេភាគី​ជាមួយ​ នាយឧត្តមសេនីយ៍ ស ថេត អគ្គស្នងការនគរបាលជាតិកម្ពុជា កាលពីថ្ងៃទី២០ ខែតុលា ឆ្នាំ២០២៣​នេះ នៅប្រទេសឡាវ ខណៈដែល​ភាគី​ទាំង​ពីរ​អញ្ជើញ​ទៅ​ចូល​រួម​សន្និសីទ​អាស៊ាន​ណាប៉ូល​ លើកទី៤១ ដែលប្រ ទេសឡាវធ្វើជាម្ចាស់ផ្ទះ។

យោង​​តាម​​សេចក្តីប្រកាសព័ត៌មានរបស់អគ្គស្នងការដ្ឋានគរបាលជាតិកម្ពុជា នាថ្ងៃទី២២ ខែតុលា ឆ្នាំ២០២៣នេះ ស្តីពីលទ្ធផលនៃការចូលរួមសន្និសីទអាស៊ានណាប៉ូលលើកទី៤១រដ្ឋធានីវៀងច័ន្ទ នៃ​សាធារណរដ្ឋប្រជាធិបតេយ្យប្រជាមានិតឡាវ បានបញ្ជាក់ថា នៅក្នុងកិច្ចជំនួបនោះ អ្នកស្រី Lesa Jane GALEបាន កោតសរសើរ និងវាយ​តម្លៃ​ខ្ពស់​ចំពោះ​កិច្ច​សហការ​រវាង​នគរបាល​សហព័ន្ធ​អូស្រ្តាលី និងនគរបាលជាតិ កម្ពុជា។ លោកស្រី«សូមចាត់ទុកនគរបាលជាតិកម្ពុជាគឺជាដៃគូសហប្រតិបត្តិការនាំមុខក្នុងតំបន់ ក្នុង​កិច្ច​ប្រតិបត្តិការ​ទប់ស្កាត់ និងប្រយុទ្ធប្រឆាំងបទល្មើសគ្រប់ប្រភេទ ជាពិសេស​បទ​ល្មើស​ឆ្លង​ដែន​មាន​អង្គការ​ចាត់តាំង ដូចជា បទល្មើសគ្រឿងញៀន បទល្មើសបច្ចេកវិទ្យា បទល្មើស​សំអាត​ប្រាក់​....ក៏ដូចជាបទល្មើសផ្លូវភេទកុមារជាដើម»។

នៅចំពោះ​មុខ​អគ្គស្នងការនគរបាលជាតិកម្ពុជា លោកស្រី Lesa Jane GALE ក៏បានអះអាង​ផង​ដែរ​ថា ក្នុងនាមឯកឧត្តមអគ្គស្នងការនគរបាលសហព័ន្ធអូស្រ្តាលី និងក្នុង​នាម​ជា​ថ្នាក់​ដឹកនាំ​ទទួល​កិច្ច​ការ​ទំនាក់ទំនងអន្តរជាតិ លោកស្រី ប្តេជ្ញារក្សា​ទំនាក់​ទំនង​ជាមួយ​នគរបាល​កម្ពុជា​ឲ្យ​កាន់​តែមា​ន​វិសាលភាពទូលំទូលាយបន្ថែមទៀតនាពេលអនាគត។

ថ្លែងនៅក្នុងកិច្ចជំនួបនោះដែរ នាយឧត្តមសេនីយ៍ ស ថេត បានថ្លែងថា នគរបាល​ជាតិ​កម្ពុជា​រីក​រាយ​ស្វាគមន៍ និងបើកទ្វាទទួលយករាល់កិច្ចសហការគ្រប់ពេលវេលា ដោយប្តេជ្ញា​រួម​គ្នា​បន្ត​អនុវត្ត​យន្តការ​ដែល​មានស្រាប់ ធ្វើការផ្លាស់ប្តូរព័ត៌មានបើកការស្រាវជ្រាវ ស៊ើបអង្កេត ឈានទៅ​បោស​សំអាត​ក្រុម​ឧក្រិដ្ឋជនមានការចាត់តាំងគ្រប់ប្រភេទដែលរត់គេចខ្លួន ឬសម្ងំលាក់​ខ្លួន​ប្រព្រឹត្ត​បទ​ល្មើស ឬបង្កអស្ថិរភាពសន្តិសុខដល់ប្រទេសទាំងពីរ។

នាយឧត្តមសេនីយ៍អគ្គស្នងការនគរបាលជាតិកម្ពុជាក៏បានថ្លែងនូវអំណរគុណចំពោះនគរបាលសហព័ន្ធ​អូស្ត្រាលី ដែលបានរួមចំណែកជួយជ្រោមជ្រែងដល់អាជ្ញាធរកម្ពុជា ក្នុងការ​ប្រឹងប្រែង​អនុវត្ត​បាន​ជោគ​ជ័យស្របតាមអនុសាសន៍របស់ក្រុមការងារប្រតិបត្តិការហិរញ្ញវត្ថុFATF ដែលធ្វើ​ឲ្យ​ប្រទេស​កម្ពុជា បានចេញផុតពីបញ្ជីប្រផេះនៃការសម្អាតប្រាក់។ ជាមួយ​និង​ជោគជ័យ​ដ៏​ត្រចះ​ត្រចង់​នេះ ​នគរបាលជាតិកម្ពុជានឹងបន្តខិតខំប្រឹងប្រែងអនុវត្តកិច្ចការនេះឲ្យបានជាប់ជាប្រចាំ ដើម្បី​ជំរុញ​ចំណាត់ថ្នាក់កម្ពុជាឲ្យកាន់តែល្អក្នុងការងារប្រយុទ្ធប្រឆាំងការសម្អាតប្រាក់នេះ។

 នៅក្នុងកិច្ចជំនួបនោះដែរនាយឧត្តមសេនីយ៍ ស ថេត ក៏បានស្នើសុំ​នគរបាល​សហព័ន្ធ​អូស្រ្តាលី​បន្ត​ពិនិត្យ​លទ្ធ​ភាពរៀបចំវគ្គបណ្តុះបណ្តាល បង្កើនសមត្ថភាពមន្រ្តីជំនាញ ដើម្បីទទួលបាន​នូវ​ចំណេះ​ដឹង​ថ្មី​ៗឆ្លើយតបបានទាន់ពេលវេលាចំពោះបទល្មើសប្រើប្រាស់ប្រព័ន្ធបច្ចេកវិទ្យា ដែល​កំពុង​មាន​កំណើន និងគំរាមកំហែងដល់សន្តិសុខ និងសុវត្ថិភាពដល់ប្រជាពលរដ្ឋទាំងក្នុតំបន់ និង​សកល​លោក​ផងដែរ៕ អត្ថបទបាន ចក់