ស្ថាប័នជំនាញដឹកនាំប្រតិភូ និងក្រុមការងារបច្ចេកទេសក្រសួង ចុះត្រួតពិនិត្យ​វឌ្ឍនភាព​ការងារ​សាងសង់​ស្ពាន​ចំនួន ៣កន្លែង នៅខេត្តត្បូងឃ្មុំ និងកំពង់ចាម។

នៅថ្ងៃទី២២ ខែតុលា ឆ្នាំ២០២៣ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និង​ក្រុមការងារ​បច្ចេកទេសក្រសួង អញ្ជើញចុះត្រួតពិនិត្យវឌ្ឍនភាពការងារសាងសង់ស្ពានចំនួន ៣កន្លែង របស់គម្រោងគ្រប់គ្រងគ្រោះមហន្តរាយនៅកម្ពុជា និងអាស៊ីអាគ្នេយ៍ ជំហានទី២ ស្ថិត​ក្រោម​ជំនួយ​ហិរញ្ញប្បទានរបស់ធនាគារពិភពលោក។ ក្នុង​ឱកាស​ចុះ​ត្រួត​ពិនិត្យ​នៅ​ការដ្ឋាន​ផ្ទាល់​ឯកឧត្តម​រដ្ឋ​មន្ត្រី បានណែនាំដល់ទីប្រឹក្សា និងអ្នកអនុវត្តគម្រោង ត្រូវបង្កើនការយកចិត្តទុកដាក់ ដោយ​អនុវត្តតាមបទដ្ឋានបច្ចេកទេស និងជំរុញការងារសាងសង់ឱ្យទាន់ផែនការគ្រោងទុក។

ស្ពាន​ដែលទទួលជំនួយហិរញ្ញប្បទានរបស់ធនាគារពិភពលោកដែលត្រូវសាងសង់នោះ ស្ពានទី១ មាន​ប្រវែង ៣៨ម៉ែត្រ ស្ថិតនៅក្នុងភូមិបឹងកណ្តាល ឃុំមៀន ស្រុកអូររាំងឪ ខេត្តត្បូងឃ្មុំ។ ស្ពាន​ទី២​ ប្រវែង ៣០,០៩ម៉ែត្រ ស្ថិតនៅភូមិបឹងកណ្តាល ឃុំមៀន ស្រុកអូររាំងឪ ខេត្តត្បូងឃ្មុំ។ ស្ពាន​ទី៣ ប្រវែង ៧២, ១៥ម៉ែត្រ ស្ថិតនៅភូមិកំពង់ឪជ្រឹង ឃុំមហាលាភស្រុកកោះសូទិន ខេត្តកំពង់ចាម។

នៅថ្ងៃនោះដែរ, ឯកឧត្តមរដ្ឋមន្ត្រី ក៏បានបន្តចុះពិនិត្យវឌ្ឍនភាពផ្លូវជួសជុលបន្ទាន់ លើកំណាត់ផ្លូវ ១ខ្សែ​ប្រវែង ៨គីឡូម៉ែត្រ ស្ថិតនៅក្នុងស្រុកស៊ីធរកណ្តាល ខេត្តព្រៃវែង ដែលទទួល​រង​ការ​ខូចខាត​ធ្ងន់ធ្ងរ​ដោយ​សារជំនន់ទឹកភ្លៀង។ ឯកឧត្តមរដ្ឋមន្ត្រី ក៏បានណែនាំឱ្យមន្ត្រីបច្ចេកទេសក្រសួង ឱ្យ​ពន្លឿន​ការជួសជុលបន្ទាន់ដើម្បីសម្រួលដល់ការធ្វើដំណើរ និងការ​ដឹកជញ្ជូន​កសិផល​របស់​ប្រជាពលរដ្ឋ៕ អត្ថបទ៖ គង់ ឌិន