ឯកឧត្តម វង សូត អនុប្រធានទី២ រដ្ឋសភានៃកម្ពុជា បានស្នើដល់​អនុប្រធាន​សភា​ប្រឹក្សា​នយោបាយ​ប្រជាជនចិន ខេត្តលាវនីង ជំរុញការតភ្ជាប់សេដ្ឋកិច្ច និងពាណិជ្ជកម្ម​ ដើម្បី​ទទួល​ឱកាស​វិនិយោគបន្ថែម នៅក្នុងប្រទេសកម្ពុជា។

ការស្នើរបស់ឯកឧត្តម វង សូត បែបនេះ បានធ្វើឡើងនៅថ្ងៃទី២៣ ខែតុលា ឆ្នាំ២០២៣ ក្នុង​ឱកាស​ជួប​សម្តែងការគួរសម និងពិភាក្សាការងារជាមួយឯកឧត្តម វ៉ាង មីងយូ អនុប្រធាន​សភា​ប្រឹក្សា​នយោបាយ​ប្រជាជនចិន ខេត្តលាវនីង។

នាឱកាសនោះ ឯកឧត្តម វង សូត មានប្រសាសន៍ថា វត្តមានរបស់ ឯកឧត្តមអនុ​ប្រធាន​សភា​ប្រឹក្សា​នយោបាយ​ប្រជាជនចិន និងគណៈប្រតិភូ បានឆ្លុះបញ្ចាំងពីការ​ខិតខំ​ជំរុញ​ និង​លើក​កម្ពស់​ទំនាក់​ទំនង និងកិច្ចសហប្រតិបត្តិការរវាងប្រទេសយើងទាំងពីរក្នុងគ្រប់កម្រិត ជាពិសេស ការ​តភ្ជាប់​សេដ្ឋកិច្ច-ពាណិជ្ជកម្ម និងទំនាក់ទំនងរវាងប្រជាជន និងប្រជាជននៃប្រទេសទាំងពីរ។

ឯកឧត្តម​មានប្រសាសន៍បន្តថា ឆ្នាំ២០២៣នេះ ជាឆ្នាំនៃមិត្តភាពកម្ពុជា-ចិន ដែលប្រទេស​ទាំង​ពីរ​បាន​ប្រារព្ធ​ខួបលើកទី៦៥ នៃការបង្កើតទំនាក់ទំនងការទូត និងជាខួប១០ឆ្នាំ ដែលកម្ពុជា-ចិន ប្រកាន់​ខ្ជាប់នូវអាទិភាពនៃការអភិវឌ្ឍដើម្បីបង្កើតគំរូថ្មីនៃកិច្ចសហប្រតិបត្តិការខ្សែក្រវ៉ាត់ និងផ្លូវ។

ឯកឧត្តម​បន្ថែមថា ក្នុងរយៈពេលជាង ៦ទសវត្សន៍មកនេះ កិច្ចសហប្រតិបត្តិការយ៉ាងជិតស្និទ្ធ និង​គ្រប់​ជ្រុងជ្រោយ រវាងប្រទេសទាំងពីរ មានការវិវឌ្ឍយ៉ាងស្វាហាប់ និងត្រូវ​បាន​បន្ត​ពូន​ជ្រុំ​ដោយ​ថ្នាក់​ដឹកនាំគ្រប់ជំនាន់ ដែលបង្ហាញឱ្យឃើញយ៉ាងច្បាស់តាមរយៈការបំពេញទស្សនកិច្ចផ្លូវការ របស់​សម្តេច​ធិបតី ហ៊ុន ម៉ាណែត នាយករដ្ឋមន្ត្រី ទៅកាន់សាធារណរដ្ឋប្រជាមានិតចិន កាល​ពី​ពេល​ថ្មី​ៗ​នេះ ហើយថ្នាក់ដឹកនាំទាំងពីរ បានប្តេជ្ញាចិត្តជំរុញកិច្ចសហប្រតិបត្តិការត្បូងពេជ្រ រួម​ទាំង​បាន​ដាក់ចេញផែនការសកម្មភាពរួមគ្នា ដើម្បីកសាង​សហគមន៍​វាសនា​រួម​គ្នា​ប្រកប​ដោយ​គុណភាព និងស្តង់ដារខ្ពស់ក្នុងយុគសម័យថ្មី។

ឆ្លៀតក្នុងឱកាសនោះឯកឧត្តមអនុប្រធានទី២រដ្ឋសភា បានស្នើដល់ភាគី​ចិន​ក្នុង​ការ​ជំរុ​ញ​បន្ថែម​ទៀត​ ដើម្បីតភ្ជាប់វិស័យសេដ្ឋកិច្ច ពាណិជ្ជកម្ម វិនិយោគ និងវប្បធម៌ រវាងខេត្តលាវនីង និង​កម្ពុជា​ តាមរយៈ​ការ​លើកទឹកចិត្តដល់អ្នកធុរកិច្ចចិន ក៏ដូចជាប្រជាជនខេត្តលាវនីងមកធ្វើទេសចរកម្សាន្ត និងស្វែង​រកឱកាសវិនិយោគនៅកម្ពុជាឱ្យបានកាន់តែច្រើនបន្ថែមទៀត។

ក្នុងន័យនេះ ឯកឧត្តមអនុប្រធានទី២រដ្ឋសភា បានប្រកាស​គាំទ្រ​ចំពោះ​គម្រោង​វិនិយោគ​បង្កើត​ទី​ក្រុង​សម្ព័ន្ធភាព រវាងខេត្តព្រះសីហនុរបស់កម្ពុជា និងខេត្តលាវនីង ដែលជាខេត្តដ៏មានសក្តានុពល លើ​គ្រប់វិស័យរបស់ចិន ព្រមទាំងការបង្កើតសួនឧស្សាហកម្ម នៅខេត្តព្រះសីហនុ ដែល​អាច​នឹង​ផ្តល់​ផល​ប្រយោជន៍ជាច្រើនដល់សេដ្ឋកិច្ច និងប្រជាជននៃខេត្តទាំងពីរ ស្របតាម​គោល​នយោបាយ​បន្ស៊ី​គ្នា រវាងគំនិតផ្តួចផ្តើមខ្សែក្រវ៉ាត់ និងផ្លូវរបស់ចិន ជាមួយនឹង​យុទ្ធសាស្រ្ត​បញ្ចកោណ​របស់​រាជរដ្ឋាភិបាលកម្ពុជា។

ចំណែក​ទំនាក់ទំនងរវាង រដ្ឋសភាកម្ពុជា និងសភាប្រជាជនចិន ឯកឧត្តម វង សូត ថ្លែងថា សភា​ប្រទេស​ទាំងពីរ​បានធ្វើកិច្ចសហប្រតិបត្តិការជាមួយគ្នាយ៉ាងជិតស្និតផងដែរ តាមរយៈការ​ចុះ​អនុស្សារណៈ​ជាមួយគ្នា ការផ្លាស់ប្តូរទស្សនកិច្ចរវាងថ្នាក់ដឹកនាំរដ្ឋសភា គណៈកម្មការជំនាញ និង​មន្រ្តី​បច្ចេកទេសគ្រប់លំដាប់ថ្នាក់ផងដែរ៕ អត្ថបទ សេក ឧត្តម