ភាគហ៊ុននៅក្នុងក្រុមហ៊ុន Foxconn របស់កោះតៃវ៉ាន់ ដែលជាក្រុមហ៊ុនផ្គត់ផ្គង់ដ៏សំខាន់សម្រាប់ទូរស័ព្ទ iPhone របស់ក្រុមហ៊ុន Apple បានធ្លាក់ចុះ ៣ភាគររយ នៅថ្ងៃចន្ទ (ទី២៣ ខែតុលា) បន្ទាប់ពីមានរបាយការណ៍មួយថា ក្រុមហ៊ុន គឺជាកម្មវត្ថុនៃសវនកម្មពន្ធ និងការស៊ើបអង្កេតការប្រើប្រាស់ដីធ្លី នៅប្រទេសចិន ដែលកើតឡើងប៉ុន្មានខែមុនការបោះឆ្នោត នៅកោះតៃវ៉ាន់។

ការស៊ើបអង្កេតពន្ធរបស់ប្រទេសចិនលើក្រុមហ៊ុន Foxconn គឺជារឿងមិនធម្មតាទេ ហើយក្រុមហ៊ុននេះ អាចត្រូវបានជ្រើសរើសយកមកពាក់ព័ន្ធសម្រាប់ «ហេតុផលនយោបាយ»។ នេះបើតាមប្រភព២ ដែលជិតស្និទ្ធនឹងក្រុមហ៊ុន Foxconn បានប្រាប់មកសារព័ត៌មាន Reuters នៅថ្ងៃចន្ទនេះ បន្ទាប់ពីសារព័ត៌មាន Global Times ដែលគាំទ្រដោយរដ្ឋចិន បានរាយការណ៍ថា ក្រុមហ៊ុននេះ គឺជាកម្មវត្ថុនៃការផ្ទៀងផ្ទាត់ដំណើរការពន្ធ និងការស៊ើបអង្កេតលើការប្រើប្រាស់ដីធ្លី។

ក្រុមហ៊ុន Foxconn បានឲ្យដឹងនៅក្នុងសេចក្តីថ្លែងការណ៍ កាលពីថ្ងៃអាទិត្យ (ទី២២ ខែតុលា) ថា ការគោរពតាមច្បាប់ គឺជា «គោលការណ៍គ្រឹះ» នៃប្រតិបត្តិការរបស់ខ្លួន នៅគ្រប់ទីកន្លែងទាំងអស់ ហើយថា ក្រុមហ៊ុននឹង «សហការយ៉ាងសកម្មជាមួយអង្គភាពពាក់ព័ន្ធ ទាក់ទងនឹងការងារ និងប្រតិបត្តិការនានា»។ តែក្រុមហ៊ុនបានបដិសេធផ្ដល់ការអត្ថាធិប្បាយបន្ថែម នៅពីថ្ងៃចន្ទនេះ៕