អ្នកឡើងអគារដ៏ល្បីរបស់បារាំងលោក Alain Robert កាលពីថ្ងៃអាទិត្យម្សិលមិញ បានឡើងអគារប៉មនៅក្នុងសង្កាត់ធុរកិច្ចរបស់ទីក្រុងប៉ារីស ដើម្បីអំពាវនាវឲ្យមានសន្តិភាព ស្របពេលជម្លោះតានតឹងរវាងអ៊ីស្រាអែល និងប៉ាឡេស្ទីន ។

 លោក Robert ដែលគេស្គាល់ថាជាមនុស្សពីងពាងបារាំង បានឡើងអគាប៉ម Hekla កម្ពស់ ២២០ម៉ែត្រ ស្ថិតក្នុងសង្កាត់ La Defense នៃរដ្ឋធានីប្រទេសបារាំងមួយនេះ ។

 លោក Robert បាននិយាយប្រាប់ទីភ្នាក់ងារព័ត៌មានរ៉យទ័រ មុនពេលឡើងថា លោកមិនព្យាយាមដើម្បីរើសយកខាងណា ខាងប៉ាឡេស្ទីន ឬខាងអ៊ីស្រាអែលនោះទេ ប៉ុន្តែតាមគំនិតរបស់ខ្ញុំ មាននូវរឿងបន្ទាន់ និងសំខាន់មួយត្រូវធ្វើ ដែលត្រូវស្តាប់គ្នា ហើយត្រូវចុះហត្ថលេខាលើកិច្ចព្រមព្រៀងសន្តិភាពដែលមានរយៈពេលយូរ ។

លោក Robert បានអំពាវនាវផងដែរឲ្យក្រុមមេដឹកនាំពិភពលោកអង្គុយជុំវិញតុ និងខិតខំដើម្បីកិច្ចព្រមព្រៀងសន្តិភាព ដោយលោកបន្តថា បើមិនដូច្នេះទេ ពួកយើងនឹងស្ថិតនៅលើមាត់ជ្រោះនៃការធ្លាក់ក្នុងសង្រ្គាមលោកលើកទី ៣ហើយ ។

 វាបានចំណាយពេល ២ម៉ោង ទើបលោកឡើងដល់កំពូលអគារ ។

 អ៊ីស្រាអែល បានបើកការវាយប្រហារតាមច្រកអាកាសឥតឈប់ឈរលើតំបន់ហ្គាហ្សា ក្រោយពេលដែលក្រុមជីវពលហាម៉ាស់ បានបំពានព្រំដែន និងបើកការវាយឆ្មក់ដ៏គួរឲ្យភ្ញាក់ផ្អើលមួយនៅទូទាំងតំបន់សហគមន៍ជិតគ្នា ដោយបានសម្លាប់មនុស្ស ១.៤០០នាក់ និងចាប់ចំណាប់ថ្នូរ ២១២នាក់ ទៅកាន់តំបន់ហ្គាហ្សា ។

 ក្តីកង្វល់ពីហានិភ័យនៃសង្រ្គាមអ៊ីស្រាអែល-ហាម៉ាស់ នឹងរីកដូចផ្សិតនៅក្នុងជម្លោះទ្រង់ទ្រាយធំនៅតំបន់មជ្ឈិមបូព៌ានោះ បានកើតមានឡើងកាលពីថ្ងៃអាទិត្យ ពេលដែលសហរដ្ឋអាមេរិក បញ្ជូនគ្រឿងយុទ្ធោបករណ៍បន្ថែមទៀត ទៅកាន់តំបន់មួយនេះ ស្របពេលដែលអ៊ីស្រាអែល បន្តវាយប្រហារយ៉ាងសន្ធាប់នៅពេលយប់លើតំបន់ហ្គាហ្សា ហើយនិងវាយប្រហារក្រុមអ្នកគាំទ្រហាម៉ាសនៅប្រទេសលីបង់ និងប្រទេសស៊ីរី ៕