កាលពីថ្ងៃអាទិត្យម្សិលមិញ ឥណ្ឌា បានបញ្ចូនយន្តហោះដឹកជំនួយមនុស្សធម៌មួយគ្រឿងទៅកាន់ប្រទេសអេហ្ស៊ីប សម្រាប់ជនប៉ាឡេស្ទីន ស្របពេលដែលសង្រ្គាមរវាងអ៊ីស្រាអែល និងក្រុមហាម៉ាស់នៅតែបន្តឡើងកម្តៅខ្លាំង ។ 

 ក្រសួងសុខាភិបាលតំបន់ហ្គាហ្សា និយាយកាលពីថ្ងៃសៅរ៍ថា ការវាយប្រហារដោយមីស៊ីល និងតាមច្រកអាកាសរបស់អ៊ីស្រាអែល ជាការសងសឹកវិញនោះ បានសម្លាប់ជនប៉ាឡេស្ទីនយ៉ាងហោច ៤.៣៨៥នាក់ ដែលរួមទាំងកុមាររាប់រយនាក់ ក្នុងនោះ មនុស្សជាង ១លាននាក់នៅក្នុងដែនដីបិទច្រកដែលមានពលរដ្ឋរស់នៅ ២,៣លាននាក់មួយនេះ បានជម្លៀសខ្លួនចេញ ។ 

 ក្រសួងការបរទេសឥណ្ឌា បានសរសេរនៅក្នុងសារបង្ហោះលើបណ្តាញព័ត៌មានសង្គម X ដែលជាអតីតបណ្តាញព័ត៌មានសង្គម Twitterថា យន្តហោះកងកម្លាំងអាកាសឥណ្ឌា ដឹកជំនួយវេជ្ជសាស្រ្ត ៦,៥តោន និងជំនួយគ្រោះមហន្តរាយ ៣២តោន សម្រាប់ជនប៉ាឡេស្ទីន បានចាកចេញទៅកាន់អាកាសយានដ្ឋាន El-Arish នៅក្នុងប្រទេសអេហ្ស៊ីប ។ 

 សម្ភារៈទាំងអស់នេះ រួមមានឱសថសង្រ្គោះជីវិតដ៏ចាំបាច់ ឧបករណ៍វះកាត់ សម្ភារៈអនាម័យ និងគ្រាប់ថ្នាំបន្សុតទឹក ស្ថិតនៅក្នុងចំណោមសម្ភារៈចាំបាច់ជាច្រើនទៀត ។ 

 សូមបញ្ជាក់ថា អ៊ីស្រាអែល បានបើកការវាយប្រហារតាមច្រកអាកាសឥតឈប់ឈរលើតំបន់ហ្គាហ្សា ក្រោយពេលដែលក្រុមជីវពលហាម៉ាស់ បានបំពានព្រំដែន និងបើកការវាយឆ្មក់ដ៏គួរឲ្យភ្ញាក់ផ្អើលមួយនៅទូទាំងតំបន់សហគមន៍ជិតគ្នា ដោយបានសម្លាប់មនុស្ស ១.៤០០នាក់ និងចាប់ចំណាប់ថ្នូរ ២១២នាក់ ទៅកាន់តំបន់ហ្គាហ្សា ៕