ក្រុមនគរបាលអេស្ប៉ាញនិយាយនៅថ្ងៃចន្ទនេះថា អេស្ប៉ាញ រឹបអូសបានវត្ថុបុរាណធ្វើពីមាសតម្លៃ ៦៣,៦លានដុល្លារដែលត្រូវបានគេលួចពីប្រទេសអ៊ុយក្រែន ក្រោយចាប់បានក្រុមចោរ ពេលពួកគេព្យាយាមលក់នៅទីក្រុងម៉ាឌ្រីដ ។ 

 ក្រុមនគរបាលនិយាយនៅក្នុងសេចក្តីថ្លែងការណ៍ថា វត្ថុបុរាណ ១១ដុំ មកពីវប្បធម៌ស៊ីធីយ៉ា ដែលត្រូវបានគេតាំងពិព័រណ៍នៅសារមន្ទីរទីក្រុងគីវ ចន្លោះឆ្នាំ ២០០៩ និងឆ្នាំ ២០១៣ ត្រូវបានគេរត់ពន្ធចេញពីប្រទេសអ៊ុយក្រែនកាលពីឆ្នាំ ២០១៦ ។ 

 ជនជាតិអេស្ប៉ាញ ៣នាក់ និងជនជាតិអ៊ុយក្រែន ២នាក់ ត្រូវបានចាប់ខ្លួន បន្ទាប់ពីការស៊ើបអង្កេតដែលបានចាប់ផ្តើមឡើង ពេលដុំមួយក្នុងចំណោមវត្ថុបុរាណ ដែលជាខ្សែក្រវ៉ាត់មាសមានក្បាលចៀម ត្រូវបានលក់កាលពីឆ្នាំ ២០២១ នៅទីក្រុងម៉ាឌ្រីដ ។ 

 ក្រុមនគរបាល បានរកឃើញជនសង្ស័យដែលមាន វត្ថុបុរាណដុំផ្សេងទៀត ពេលដែលពួកគេព្យាយាមលក់ ។ 

 ដុំវត្ថុបុរាណទាំងនេះ បានបន្លំឯកសារដើម្បីធ្វើឲ្យវាដូចជារបស់វិហារគ្រិស្តអូស្សូដក់អ៊ុយក្រែន ។  

 កម្មសិទ្ធិវត្ថុបុរាណនេះ ត្រូវបានផ្ទេរទៅឲ្យបុព្វជិតអូស្សូដក់អ៊ុយក្រែន ដែលមានមូលដ្ឋាននៅទីក្រុងម៉ាឌ្រីដ ។ 

 វត្ថុបុរាណនេះដែរ ត្រូវបានសិក្សានៅសារមន្ទីរបុរាណវិទ្យាជាតិអេស្ប៉ាញ និងវិទ្យាស្ថានបេតិកភណ្ឌវប្បធម៌អេស្ប៉ាញ ៕