យោធាអ៊ីស្រាអែលបានបង្កើនការវាយប្រហារតាមអាកាសលើតំបន់ហ្កាហ្សា មុនពេលការវាយលុក ដោយ​ថ្មើរជើង ដែលរំពឹងទុកលើតំបន់ឡោមព័ទ្ធប៉ាឡេស្ទីន ដោយរុញ​ប្រព័ន្ធ​វេជ្ជសាស្ត្រ​ក្នុង​តំបន់​នេះ​ធ្លាក់​ដល់​កម្រិតស្ទើរដួលរលំ ហើយធ្វើឱ្យប្រជាជនដែលអស់សង្ឃឹមត្រូវការជំនួយជាបន្ទាន់។      

មន្ទីរ​ពេទ្យអាល់ ស៊ីហ្វា(Al-Shifa) ស្ថិតនៅភាគខាងលិច ទីក្រុង ហ្កាហ្សា (Gaza) គឺជា​ស្ថាប័ន​វេជ្ជសាស្ត្រ​ដ៏​ធំ​បំផុតមួយ ក្នុងចំណោមស្ថាប័នវេជ្ជសាស្ត្រជាច្រើននៅភាគខាងជើង ហ្កាហ្សា ។ ចាប់តាំងពីការផ្ទុះជម្លោះរវាងប៉ាឡេស្ទីន និងអ៊ីស្រាអែល កាលពីថ្ងៃទី ៧ខែតុលា មក មន្ទីរពេទ្យ​នេះ​បាន​ទទួលអ្នករបួសមួយចំនួនធំក្នុងការវាយប្រហារតាមអាកាសរបស់អ៊ីស្រាអែល ហើយ​ស្ទើរ​តែ​បាន​ប្រែក្លាយ​ទៅជាជម្រកសម្រាប់ជនភៀសខ្លួន។    

បច្ចុប្បន្ន មន្ទីរពេទ្យដែលមានមនុស្សច្រើនលើសចំណុះ និងអស់ប្រេងឥន្ធនៈផងនោះ ស្ទើរ​តែ​មិន​អាច​ទប់​ទល់​នឹងដំណើរការសង្រ្គោះអ្នកជំងឺបាន។ 

លោក អាស្រាហ្វ អាល់ គូដ្រា (Ashraf Al-Qudra) អ្នកនាំពាក្យ​របស់​ក្រសួង​សុខាភិបាល​ប៉ាឡេស្ទីន​ បាននិយាយថា  ធនធានវេជ្ជសាស្រ្តនៅក្នុងមន្ទីរពេទ្យនេះបានអស់ទាំងស្រុង។ យើង​សង្ឃឹម​យ៉ាង​ម៉ុត​មាំ​ថា​ ការ​ផ្គត់ផ្គង់​ផ្នែក​វេជ្ជសាស្រ្ត​អាច​មក​ដល់​ឱ្យ​បាន​ឆាប់​តាម​ដែល​អាច​ធ្វើ​ទៅ​បាន​ អាចនាំចូល ប្រេងឥន្ធនៈបាន ហើយអ្នកជំងឺ និងរបួស​អាច​ត្រូវ​បាន​ជម្លៀស​ចេញ​ជា​បន្ទាន់​នៅ​ខាង​ក្រៅតំបន់ហ្កាហ្សា។ យើងសូមអំពាវនាវដល់សហគមន៍អន្តរជាតិ និងអង្គការ​អន្តរជាតិ​នានា ឱ្យជួយអន្តរាគមន៍ជាបន្ទាន់ និងផ្តល់​ជំនួយ​ស្រប​តាម​អាទិភាព​របស់​ក្រសួង​សុខាភិបាល​ហ្កាហ្សា ដើម្បីសម្រាលស្ថានភាពជំងឺធ្ងន់ធ្ងរនៅក្នុងមន្ទីរពេទ្យនេះ។

នៅក្នុង​សហគមន៍មួយដែលមិនឆ្ងាយពីមន្ទីរពេទ្យ Al-Shifa អគារជាច្រើនត្រូវបានបាក់រាបដល់ដី ដោយសារ​ការវាយឆ្មក់តាមអាកាសជាបន្តបន្ទាប់របស់អ៊ីស្រាអែល៕