ក្រុមអ្នកគាំទ្រប៉ាឡេស្ទីនរាប់រយនាក់ បានដើរដង្ហែទៅកាន់ស្ថានកុងស៊ុលសហរដ្ឋអាមេរិក នៅទីក្រុងការ៉ាជី ប្រទេសប៉ាគីស្ថាន ដើម្បីថ្កោលទោស​ការ​គាំទ្រ​របស់​សហរដ្ឋ​អាមេរិក​ចំពោះ​ការ​ទម្លាក់​គ្រាប់​បែករបស់អ៊ីស្រាអែលនៅតំបន់ហ្កាហ្សា។

ការហែក្បួន នេះត្រូវបានរៀបចំឡើងដោយអង្គការម៉ាចលីសអ៊ី វ៉ាដេត អ៊ុលម៉ូស្លីមីន(Majlis-e-Wahdat-ul-Muslimeen) ជាស្ថាប័នជាតិនៃក្រុមអ៊ីស្លាមនិកាយស៊ីអ៊ីត (Shi’ite) និង​បព្វជិត​សាសនា​នៅ​ក្នុងប្រទេសប៉ាគីស្ថាន។ ក្រុមអ្នកតវ៉ាត្រូវបានបញ្ឈប់នៅចម្ងាយប្រហែលកន្លះគីឡូម៉ែត្រពីស្ថានកុងស៊ុលសហរដ្ឋអាមេរិក។ក្រុម​បាតុករបានដុតទង់ជាតិអ៊ីស្រាអែល និងអាមេរិក ហើយបាន​ជំរុញ​ឱ្យ​ប្រទេស​មូស្លីម​បញ្ចប់​ទំនាក់​ទំនង​ការទូតជាមួយអ៊ីស្រាអែល។

ចំណែក​នៅប្រទេសឥណ្ឌាវិញនិស្សិតរាប់សិបនាក់ដែលកំពុងតវ៉ានៅទីក្រុងញូវដេលី (New Delhi) ដោយស្ងប់ស្ងាត់ដើម្បីគាំទ្រជនជាតិប៉ាឡេស្ទីនត្រូវបាននគរបាលឃាត់ខ្លួនកាលពីថ្ងៃចន្ទ ២៣ ខែតុលា ហើយបានអូសចូលទៅក្នុងរថយន្ត។

ក្រុម​បាតុករដែលភាគច្រើនមកពីអង្គការនិស្សិតឆ្វេងនិយមមួយចំនួន បានដើរ​ឆ្ពោះ​ទៅ​កាន់​ស្ថាន​ទូត​អ៊ីស្រាអែល នៅពេលមានការប៉ះទង្គិចគ្នាបានកើតឡើង។ អ៊ីស្រាអែល​បាន​ទម្លាក់​គ្រាប់​បែក​លើ​តំបន់​ហ្កាហ្សា ព្រមទាំងបង្កើនការវាយប្រហារតាមអាកាសបន្ថែមទៀតកាលពីថ្ងៃចន្ទ ខណៈ​ទាហាន​របស់​ខ្លួនបានប្រយុទ្ធជាមួយពួកសកម្មប្រយុទ្ធហាម៉ាសនៅលើដី ក្នុងការ​វាយ​ឆ្មក់​នៅ​តំបន់​ឡោម​ព័ទ្ធ​ប៉ាឡេស្ទីន។ ក្រសួងសុខាភិបាលហ្កាហ្សានិយាយថា មនុស្សចំនួន ៤៣៦ នាក់​បាន​ស្លាប់​ដោយ​ការ​វាយប្រហារតាមអាកាសរបស់អ៊ីស្រាអែលក្នុងរយៈពេល ២៤ម៉ោងចុងក្រោយនេះ ដែល​ភាគច្រើននៃពួកគេស្ថិតនៅភាគខាងត្បូងនៃតំបន់ហ្កាហ្សាដ៏តូចចង្អៀត និងមាន​ប្រជាជន​រស់​នៅ​ច្រើន​។ ក្រសួងសុខាភិបាលបាននិយាយថា ជនជាតិប៉ាឡេស្ទីនយ៉ាងហោចណាស់៥.០៨៧ នាក់​បាន​ស្លាប់ នៅក្នុងការវាយប្រហារមានអាយុកាលពីរសប្តាហ៍ ក្នុងនោះ​មាន​កុមារ​ចំនួន​២.០៥៥នាក់៕