ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ថ្លែងថា ក្រសួង​នឹងពង្រីក​សេវា​សុខភាព​​បន្ថែម​នៅតាមមូលដ្ឋានសុខាភិបាល គ្រប់លំដាប់ថ្នាក់ ដើម្បីគាំទ្រដល់ជនមានពិការភាព និង​កាត់បន្ថយបន្ទុកលំបាករបស់របស់ជនមានពិការភាព ក្រោមកិច្ច​សហប្រតិបត្តិការ​របស់​គម្រោង​ ATscale នៅកម្ពុជា និងដៃគូអភិវឌ្ឍន៍ផ្សេងទៀត។

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានបញ្ជាក់បែបនេះ ក្នុង​ឱកាស​ទទួល​ជួប​ពិភាក្សារងារ ជាមួយក្រុមការងារគម្រោង ATscale នៅកម្ពុជា ដឹកនាំដោយលោក Pascal Jeroen Bijleveld នាយកប្រតិបត្តិគម្រោង ATscale នៅទីស្តីការក្រសួងសុខាភិបាល នារ​សៀលថ្ងៃទី២៣ ខែតុលា ឆ្នាំ២០២៣។ 

ឯកឧត្តម​បានស្វាគមន៍ និងថ្លែងអំណរគុណដល់ក្រុមការងារគម្រោង ATscale នៅកម្ពុជា ដែល​បាន​រៀបចំ​គម្រោងចូលរួមគាំទ្រក្រសួងសុខាភិបាល លើសេវាស្ដារលទ្ធភាពពលកម្ម និង​ឧបករណ៍​អវយវៈ​សិប្បនិម្មិត ដើមី្បជួយឱ្យជនមានពិការភាពរស់នៅប្រកបដោយសុខភាពល្អ មាន​ផលិត​ភាព​ មានឯករាជ្យ សេចក្តីថ្លៃថ្នូ និងអាចចូលរួមក្នុងសកម្មភាពអប់រំបណ្តុះបណ្តាល ទីផ្សារការងារ និង​សកម្មភាពជីវិតប្រចាំថ្ងៃបានជាប្រក្រតី។

ឯកឧត្តម​មានប្រសាសន៍ថា ក្រសួងសុខាភិបាល នឹងសហការ​គាំទ្រកា​រផ្ទេ​រ​សេវា​ស្ដារ​លទ្ធភាព​ពលកម្ម និងឧបករណ៍អវយវៈសិប្បនិម្មិត ឧបករណ៏ជំនួយការស្តាប់ ដើមី្បជួយ​ឱ្យ​ជន​មាន​ពិការ​ភាព​រស់នៅ​ប្រកបដោយសុខភាពល្អ។ ទន្ទឹមនឹងនេះ ATscale នឹងជួយសម្រប​សម្រួល​ជាមួយ​ភាគី​ពាក់​ព័ន្ធទាំងអស់ ក្នុងការផ្ទេរមុខងារ ភារកិច្ច ឯកសារគតិយុត្តិពាក់ព័ន្ធនានា និងជួយ​រៀប​ចំ​ផែន​ការ​ទាំង​រយៈពេលខ្លី និងរយៈពេល​វែង​ដោយ​សហការ​ជា​មួយ​ផ្នែក​ពាក់​ព័ន្ធ​របស់​ក្រសួង​សុខាភិបាល។

ឯកឧត្តមរដ្ឋមន្រ្ដីបញ្ជាក់ថា ក្រសួងនឹង​ពង្រីក​សេវា​សុខភាព​បន្ថែម​នៅ​តាម​មូលដ្ឋាន​សុខាភិបាល​គ្រប់​លំដាប់​ថ្នាក់ ដើម្បីគាំទ្រដល់ជនមានពិការភាព និងកាត់បន្ថយបន្ទុកលំបាកផ្សេងៗ ក្រោមកិច្ច​សហប្រតិបត្តិការ​របស់ គម្រោង ATscale នៅកម្ពុជា និងដៃគូអភិវឌ្ឍន៍ទាំងអស់។ 

លោក Pascal Jeroen Bijleveld ថ្លែងថា គម្រោង ATscale នេះបានរៀបចំ​ឡើង​ដោយ​មាន​ការ​ពិគ្រោះ​យោបល់ជាច្រើនលើកជាមួយក្រុមការងារបច្ចេកទេសអន្តរក្រសួង ព្រមទាំងគ្រោង​នឹង​ដាក់​សម្ពោធ​នា​ពេលឆាប់ៗខាងមុខនេះ ព្រមទាំងសុំអញ្ជើញក្រសួងសុខាភិបាល ក្រសួងសង្គមកិច្ច អតីត​យុទ្ធជន និងយុវនីតិសម្បទា ចូលរួមជាអធិបតី៕ អត្ថបទ រដ្ឋា