លោក Dmytro Kuleba រដ្ឋមន្ត្រីការបរទេសអ៊ុយក្រែន បានសង្កត់ធ្ងន់ថា ទីក្រុងគីវ ដឹងពីសមត្ថភាពផលិតអាវុធវិស័យការពារជាតិនៃប្រទេសដៃគូ ចំពេលមានការភ័យខ្លាចថា ការកើនឡើងនៃជម្លោះនៅមជ្ឈិមបូព៌ា នឹងប៉ះពាល់ដល់ការគាំទ្រផ្នែកយោធាសម្រាប់ប្រទេសអ៊ុយក្រែន។

លោក Kuleba ត្រូវបានសួរថាតើអ៊ុយក្រែនត្រៀមខ្លួនរួចជាស្រេចសម្រាប់ការកាត់បន្ថយជំនួយយោធា ជាពិសេសការបាញ់កាំភ្លើងធំ ដោយសារសម្ព័ន្ធមិត្ត ទំនងជាត្រូវផ្តល់ជំនួយផ្នែកយោធាដល់អ៊ីស្រាអែលដែរ ឬទេ។

លោកបាននិយាយថា៖«យើងដឹងពីចំនួនប្រហាក់ប្រហែលនៃគ្រាប់ដែលដៃគូសំខាន់ៗរបស់យើង នឹងផលិត មិនត្រឹមតែខែក្រោយប៉ុណ្ណោះទេ ថែមទាំងរហូតដល់ដំណាច់ឆ្នាំក្រោយ។ ខ្ញុំលើកឧទាហរណ៍នេះ ជាភ័ស្តុតាងថាតើប្រធានបទនេះ ត្រូវបានដោះស្រាយយ៉ាងស៊ីជម្រៅប៉ុណ្ណា ដើម្បីការគណនានេះ ចាំបាច់ដើម្បីធានាការផ្គត់ផ្គង់ប្រកបដោយនិរន្តរភាពសម្រាប់កងទ័ពអ៊ុយក្រែន។

លោក Kuleba បានបន្ថែមថា អ៊ុយក្រែន «បានចាប់ផ្តើមប្រកាសមួយឆ្នាំមុន» ដោយនិយាយអំពីតម្រូវការក្នុងការបង្កើនការផលិតអាវុធនៅជុំវិញពិភពលោក និងជាពិសេស នៅក្នុងអ៊ុយក្រែន។