ចំនួនប្រជាជនរុស្ស៊ី ដែលនិយាយថា ប្រាក់ខែរបស់ពួកគេ មិនគ្របដណ្តប់លើការចំណាយមូលដ្ឋាន បានកើនឡើងពីចំនួន ២០ភាគរយក្នុងរយៈពេល ២ឆ្នាំ ដល់ជិតពាក់កណ្តាល នេះបើយោងតាមការស្ទង់មតិរបស់ក្រុមហ៊ុមជ្រើសរើសបុគ្គលិក Headhunter បានបង្ហាញ ខណៈទីក្រុងម៉ូស្គូ បង្វែរធនធានសារពើពន្ធដើម្បីផ្តល់មូលនិធិដល់សង្រ្គាមរបស់ខ្លួននៅអ៊ុយក្រែន។

ការរកឃើញ ដែលបានមកពីការស្ទង់មតិកាលពីខែតុលា លើមនុស្សជិត ៥.០០០នាក់នេះ បានធ្វើឱ្យវិបត្តិសេដ្ឋកិច្ចរបស់រុស្ស៊ី ស្ថិតក្នុងការផ្តោតអារម្មណ៍យ៉ាងខ្លាំង ហើយអាចធ្វើឱ្យក្រុមអាជ្ញាធរមានភាពស្មុគស្មាញក្នុងដំណើរការបោះឆ្នោតប្រធានាធិបតីនៅខែមីនា ឆ្នាំក្រោយនេះ ដែលលោកប្រធានាធិបតី វ្ល៉ាឌីមៀ ពូទីន ទំនងជានឹងបន្តកាន់អំណាច ក្នុងតំណែងរយៈពេលជាងពីរទសវត្សរ៍របស់ខ្លួននេះ។

អត្រាគ្មានការងារធ្វើទាបបំផុតនៅឆ្នាំនេះ គឺជាភស្តុតាងនៃកង្វះកម្លាំងពលកម្មយ៉ាងខ្លាំងរបស់រុស្ស៊ី ខណៈភាពទន់ខ្សោយរបស់របិយប័ណ្ណរូប្លិ៍ បានបន្ថែមបន្ទុកលើសម្ពាធអតិផរណាយ៉ាងខ្លាំង។

នៅពេលត្រូវសាកសួរថា តើប្រាក់បៀវត្សរ៍របស់ពួកគេ គ្រប់គ្រាន់ដើម្បីរ៉ាប់រងការចំណាយមូលដ្ឋានឬទេ ដោយមិនគិតពីប្រាក់ចំណូលពីការងារទីពីរ ឬការវិនិយោគនោះ មានតែពលរដ្ឋរុស្ស៊ីម្នាក់ ក្នុងចំណោមប្រាំនាក់ប៉ុណ្ណោះ ដែលឆ្លើយយល់ស្រប៕