សមាជិកគណបក្សសាធារណរដ្ឋ ដែលការបែកបាក់ផ្ទៃក្នុងរបស់គណបក្ស បានធ្វើឲ្យសភាតំណាងរាស្រ្តអាមេរិកជាប់គាំងអស់ ៣សប្តាហ៍ បានព្យាយាម កាលពីថ្ងៃចន្ទ (២៣ តុលា) ដើម្បីស្វែងរកការឯកភាពលើការជ្រើសរើសប្រធានថ្មី ដើម្បីដឹកនាំសភា និងដោះស្រាយតម្រូវការផ្ដល់មូលនិថិដល់អ៊ីស្រាអែល អ៊ុយក្រែន និងរដ្ឋាភិបាលសហព័ន្ធ។

ក្នុងកិច្ចប្រជុំដោយបិទទ្វាររយៈពេល ២ម៉ោងកន្លះ បេក្ខជនចំនួន ៨នាក់ ដែលនឹងក្លាយជាប្រធានសភា ដោយក្នុងនោះរួមមានទាំងលោក Tom Emmer សមាជិកសភាមកពីគណបក្សសាធារណរដ្ឋលំដាប់លេខ៣ បាននិយាយពីលក្ខណសម្បត្តិរបស់ខ្លួនទៅកាន់សមាជិកគណបក្សសាធារណរដ្ឋ និងបានឆ្លើយសំណួរអំពីរបៀប ដែលពួកគេនឹងដោះស្រាយកិច្ចការ ពេលទទួលបានតំណែង។

គណបក្សសាធារណរដ្ឋគ្រោងជួបគ្នាម្តងទៀត នៅព្រឹកថ្ងៃអង្គារ (ទី២៤ ខែតុលា) នេះ ដើម្បីចាប់ផ្តើមជ្រើសរើសបេក្ខជន ដោយបិទទ្វារតាមរយៈការបោះឆ្នោតសម្ងាត់ជាបន្តបន្ទាប់។ ដោយមានសំឡេងភាគច្រើនដ៏ស្ដួចស្ដើង ២២១-២១២ នៅក្នុងសភា វាមិនទាន់ច្បាស់ទេថា តើសមាជិកគណបក្សសាធារណរដ្ឋណាមួយ អាចទទួលបានសម្លេងឆ្នោតដែលត្រូវការ ដើម្បីទទួលបានតំណែងជាប្រធាននេះ។

សភាអាមេរិកអត់មានអ្នកដឹកនាំនោះទេ ចាប់តាំងពីថ្ងៃទី៣ ខែតុលា នៅពេលដែលអតីតប្រធានសភាលោក Kevin McCarthy ត្រូវបានទម្លាក់ចេញបីតំណែងប្រធាននេះ។ បន្ទាប់មក ការទាស់ទែងផ្ទៃក្នុង បានបន្ទច់បង្អាក់ការប៉ុនប៉ង ដើម្បីបានកាន់តំណែងជាអ្នកដឹកនាំនេះពីសំណាក់បេក្ខជនចំនួន ២រូប គឺលោក Steve Scalise សមាជិកសភាសាធារណរដ្ឋលេខរៀងទី២ និងលោក Jim Jordan ដែលជាអ្នកអភិរក្សដ៏លេចធ្លោ៕