ភ្នំពេញ ៖ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)កាលពីថ្ងៃទី២៣ ខែតុលា ឆ្នាំ២០២៣ បានចុះហត្ថលេខាលើអនុស្សរណៈយោគយល់គ្នា (MoU) ជាមួយគណៈកម្មាធិការអន្តរជាតិនៃកាកបាទក្រហម (ICRC) សម្រាប់ការរៀបចំការប្រកួតប្រជែងតុលាការនិម្មិតផ្នែកច្បាប់មនុស្សធម៌អន្តរជាតិនៅកម្ពុជា។ ការរៀបចំព្រឹត្តិការណ៍នេះមានគោលបំណងលើកកម្ពស់ចំណេះដឹងផ្នែកច្បាប់មនុស្សធម៌អន្តរជាតិ ក្នុងចំណោមនិស្សិត អ្នកសិក្សា និងអ្នកពាក់ព័ន្ធដទៃទៀត។

ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក. មានប្រសាសន៍ថា ការចុះហត្ថលេខាលើអនុស្សរណៈយោគយល់គ្នា ជាមួយគណៈកម្មាធិការអន្តរជាតិនៃកាកបាទក្រហម នឹងជួយបង្កើនការរៀនសូត្រអំពីច្បាប់មនុស្សធម៌អន្តរជាតិ ជាផ្នែកសំខាន់នៃយុត្តិសាស្រ្តដែល អ.វ.ត.ក. បានចូលរួមចំណែកយ៉ាងសំខាន់តាមរយៈការស៊ើបអង្កេត និងការជំនុំជម្រះផ្សេងៗ។ ដើម្បីសម្រេចបាននូវគោលបំណងនៃអនុស្សរណៈនេះ អ.វ.ត.ក. នឹងរៀបចំកម្មវិធីប្រកួតប្រជែងតុលាការនិម្មិតផ្នែកច្បាប់មនុស្សធម៌អន្តរជាតិប្រចាំឆ្នាំ ចែករំលែព័ត៌មានដល់បណ្តាញ អ្នកច្បាប់ដែលខ្លួនមាន និងផ្សព្វផ្សាយព័ត៌មាននិងការយល់ដឹង អំពីការប្រកួតប្រជែងតុលាការនិម្មិតផ្នែកច្បាប់មនុស្សធម៌អន្តរជាតិ ក្នុងដំណាក់កាលមុខងារសេសសល់របស់ អ.វ.ត.ក.»។

លោក Barnabe Reaud អនុប្រធានអ្នកសម្របសម្រួលផ្នែកការពារនៃ ICRC មានប្រសាសន៍ថា តុលាការនិមិត្តនេះ ជាឱកាសដ៏ល្អសម្រាប់និស្សិតច្បាប់ក្នុងការពង្រឹងកម្មវិធីសិក្សា និងចំណេះដឹងរបស់ខ្លួនអំពីច្បាប់មនុស្សធម៌អន្តរជាតិ និងសាខាពាក់ព័ន្ធនៃច្បាប់អន្តរជាតិ។ ក្រុមអ្នកច្បាប់នឹងបន្តគាំទ្រដល់ការអនុវត្តការលើកកម្ពស់ការប្រកួតប្រជែងរបស់តុលាការនិម្មិតផ្នែកច្បាប់មនុស្សធម៌អន្តរជាតិនេះ។ ការប្រកួតប្រជែងនៅឆ្នាំនេះ នឹងផ្តល់នូវបទពិសោធន៍ពិសេសមួយដល់និស្សិតច្បាប់ តាមរយៈការបង្ហាញអំណះអំណាងផ្លូវច្បាប់របស់ខ្លួននៅចំពោះមុខគណៈវិនិច្ឆ័យនៅ អ.វ.ត.ក.»។

អនុលោមតាមអនុស្សរណៈយោគយល់គ្នានេះ ICRC នឹងបន្តផ្តល់សម្ភារៈច្បាប់ និងផ្តល់ព័ត៌មានទំនាក់ទំនងលម្អិតរបស់ដៃគូសិក្សា និងអ្នកពាក់ព័ន្ធនានា ចំណែកឯ អ.វ.ត.ក. ទទួលខុសត្រូវក្នុងការរៀបចំការប្រកួត រួមទាំងការរៀបចំការប្រកួតប្រជែងថ្នាក់ជាតិផងដែរ។ អ.វ.ត.ក. និង ICRC នឹងបន្តគាំទ្រក្រុមឈ្នះ ដើម្បីចូលរួមក្នុងការប្រកួតប្រជែងផ្នែកច្បាប់មនុស្សធម៌អន្តរជាតិក្នុងតំបន់ ឬកម្រិតសកលដែលមានស្រាប់ ដូចជាតុលាការនិម្មិតផ្នែកច្បាប់មនុស្សធម៌អន្តរជាតិនៅហុងកុង ៕ ដោយ ៖ ដាវណ្ណ