ក្រុមវិស្វករភូមិន្ទរបស់ចក្រភពអង់គ្លេស នឹងបណ្តុះបណ្តាលកងកម្លាំងអ៊ុយក្រែន ដើម្បីការពារហេដ្ឋារចនាសម្ព័ន្ធថាមពលសំខាន់ៗពីការវាយប្រហារចម្ងាយឆ្ងាយរបស់រុស្ស៊ី ក្នុងរដូវរងានេះ។

វគ្គបណ្តុះបណ្តាលរយៈពេលពីរសប្តាហ៍ នឹងជួយវិស្វករអ៊ុយក្រែនឲ្យរៀបចំផែនការការពាររបស់ពួកគេកាន់តែប្រសើរឡើង ខណៈដែលពួកគេ ព្យាយាមការពារជនស៊ីវិលពីការប៉ុនប៉ងដែលរំពឹងទុកដោយទីក្រុងម៉ូស្គូក្នុងការធ្វើឲ្យប្រទេសដែលហែកហួរដោយសង្រ្គាមនេះ ចូលទៅក្នុងស្ថានភាពដ៏លំបាកបំផុត។

លោក Grant Shapps រដ្ឋមន្ត្រីការពារជាតិ បាននិយាយថា៖«វាចាំបាច់ណាស់ដែលអ៊ុយក្រែនទទួលបានការគាំទ្រដែលខ្លួនត្រូវការជាបន្ទាន់ពេញមួយរដូវរងា ដោយសារប្រជាជនស៊ីវិលរបស់ខ្លួន ប្រឈមនឹងគ្រោះថ្នាក់ដល់ជីវិតជារៀងរាល់ថ្ងៃពីកងកម្លាំងរបស់ពូទីន និងយុទ្ធនាការទម្លាក់គ្រាប់បែកតាមអំពើចិត្តប្រឆាំងនឹងហេដ្ឋារចនាសម្ព័ន្ធសំខាន់ៗរបស់ខ្លួន។

សមយុទ្ធនេះ នឹងពង្រឹងលើបច្ចេកទេសពីមុនដែលបង្រៀនដល់អ្នកស្ម័គ្រចិត្តអ៊ុយក្រែន រួមទាំងរបៀបប្រើថង់ខ្សាច់ ដើម្បីទទួលបានប្រសិទ្ធភាពការពារអតិបរមា និងការសាងសង់លេណដ្ឋានជាដើម។