ក្បួនរថយន្តថ្មីចំនួន ២០គ្រឿង ដែលដឹកជំនួយមនុស្សធម៌ បានទៅដល់តំបន់ហ្គាហ្សា ដែលហែកហួរដោយសង្រ្គាម ដោយចេញដំណើរពីច្រកព្រំដែន Rafah របស់ប្រទេសអេហ្ស៊ីប កាលពីថ្ងៃចន្ទ (ទី២៣ ខែតុលា)។

កាលពីថ្ងៃសៅរ៍ និងថ្ងៃអាទិត្យចុងសប្ដាហ៍កន្លងមក ក្រុមដឹកជញ្ជូនជំនួយមនុស្សធម៌ចំនួន២ បានទៅដល់តំបន់ហ្គាហ្សា តាមរយៈច្រក Rafah នេះ ដែលជាច្រកឆ្លងកាត់ព្រំដែនតែមួយគត់ រវាងតំបន់ឆ្នេរ ដែលត្រូវបានឡោមព័ទ្ធ និងប្រទេសអេហ្ស៊ីប។ តែបន្ទាប់ពីមានការបិទខ្ទប់រយៈពេល ២សប្តាហ៍ ការផ្គត់ផ្គង់ជំនួយ គឺមិនពេញលេញគ្រប់គ្រាន់ ដើម្បីដោះស្រាយស្ថានភាពមនុស្សធម៌ដ៏ធ្ងន់ធ្ង ដែលកំពុងបន្តមាន នៅតំបន់ហ្គាហ្សានោះឡើយ។

អង្គការសុខភាពពិភពលោក បានឲ្យដឹងថា រថយន្តដឹកជំនួយមនុស្សធម៌ប្រហែល ១០០គ្រឿង ត្រូវការជារៀងរាល់ថ្ងៃ ដោយសារជនជាតិប៉ាឡេស្ទីនជាង ២លាននាក់ នៅតំបន់ហ្គាហ្សា ស្ទើរតែគ្មានជីវិតរស់ ចាប់តាំងពីមានការឡោមព័ទ្ធរបស់អ៊ីស្រាអែល។

អស់រយៈពេលជាង ២សប្តាហ៍មកហើយ ដែលតំបន់ហ្គាហ្សាស្ទ្រីប បានស្ថិតនៅក្រោមការហ៊ុមព័ទ្ធរបស់អ៊ីស្រាអែល និងការវាយប្រហារសងសឹក ចំពោះការបាញ់ប្រហារដោយគ្រាប់រ៉ុក្កែតដោយចលនាតស៊ូអ៊ីស្លាម ដែលគ្រប់គ្រងតំបន់ហ្គាហ្សា (ហាម៉ាស) ប្រឆាំងនឹងអ៊ីស្រាអែល កាលពីថ្ងៃទី៧ ខែតុលា។ ជម្លោះដែលកើនឡើងកាន់តែខ្លាំងនេះ បានបណ្ដាលឲ្យមនុស្សជាង ៦.៥០០នាក់បាត់បង់ជីវិត ពីភាគីទាំងសងខាង៕