ទូរទស្សន៍រដ្ឋ CCTV បានរាយការណ៍នៅថ្ងៃអង្គារនេះថា ចិនបានដកតំណែងលោក Li Shangfu ជារដ្ឋមន្រ្តីក្រសួងការពារជាតិ និងជាទីប្រឹក្សារដ្ឋ ។ 

 CCTV រាយការណ៍ថា គណៈកម្មាធិការអចិន្រ្តៃយ៍នៃសមាប្រជាជាតិចិន ដែលជាក្រុមតំណាងរាស្រ្តជាន់ខ្ពស់របស់ប្រទេសចិន បានបោះឆ្នោតផងដែរ ដើម្បីដកអតីតរដ្ឋមន្រ្តីការបរទេសចិនលោក Qin Gan ចេញពីតំណែងរបស់លោក ជាទីប្រឹក្សារដ្ឋ ។ 

 ខណៈពេលនោះដែរ គណៈកម្មាធិការអចិន្រ្តៃយ៍ បានតែងតាំងលោក Yin Hejun ( យីន ហ៊ើជុន) ជារដ្ឋមន្រ្តីក្រសួងវិទ្យាសាស្រ្ត និងបច្ចេកវិទ្យាចិន ហើយនិងលោក Lan Foan ជារដ្ឋមន្រ្តីក្រសួងហិរញ្ញវត្ថុ ។ 

 នេះគឺជារុះរើថ្នាក់ដឹកនាំលើកទី ២របស់ចិន ក្នុងរយៈពេល ៣ខែកន្លងមកនេះ ក្រោយរដ្ឋមន្រ្តីការបរទេសលោក Qin Gang ត្រូវបានគេជំនួសតំណែងភ្លាមៗ កាលពីខែកក្កដា ។ 

 លោក Li ពុំត្រូវបានគេមើលឃើញបង្ហាញខ្លួនជាសាធារណៈនោះទេ ចាប់តាំងពីលោកមិនបានចូលរួមជំនួបនៅក្នុងប្រទេសវៀតណាមកាលពីដើមខែកញ្ញា ជាហេតុធ្វើឲ្យមានការព្យាករណ៍ពីតំណែងរបស់លោក ។ 

 លោក Li ត្រូវបានគេតែងតាំងឲ្យឡើងកាន់តំណែងរបស់លោកមួយនេះ កាលពីខែមីនា ។ លោកត្រូវបានគេឃ្លាំមើលយ៉ាងដិតដល់ដោយក្រុមការទូត និងក្រុមសង្កេតការណ៍ផ្សេងទៀត ពីព្រោះថាដូចជារូបលោក Qinអញ្ចឹង លោកគឺជាមនុស្សម្នាក់ផងដែរ ស្ថិតនៅក្នុងចំណោមទីប្រឹក្សារដ្ឋ ៥រូបរបស់ចិន ដែលជាតំណែងនៅក្នុងគណៈរដ្ឋមន្រ្តីមានឋានៈខ្ពស់ជាងរដ្ឋមន្រ្តីធម្មតា ៕