មន្ត្រីកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) នៅថ្ងៃអង្គារ (ទី២៤ ខែតុលា) នេះ បានព្រមានពីវិបត្តិ ដែលមានសភាពកាន់តែធ្ងន់ធ្ងរឡើងៗ នៅតំបន់ហ្គាហ្សា ជាមួយនឹងលក្ខខណ្ឌ ដែលស្ថិតក្នុងចំណោមស្ថានភាពដ៏អាក្រក់បំផុតមិនធ្លាប់ជួបប្រទះ។

លោក Brian Lander អនុប្រធានផ្នែកសង្គ្រោះបន្ទាន់ នៅ WFP បាននិយាយថា ប្រជាជននៅក្នុងតំបន់ហ៊ុមព័ទ្ធនេះ ត្រូវយ៉ាងខ្លាំងនូវទឹក អាហារ និងតម្រូវការចាំបាច់ទាំងអស់ សម្រាប់ជីវិតរស់នៅ។ លោកបានបន្ថែមថា មនុស្សមួយចំនួនរស់នៅជាមួយនឹងការមានទឹកតែ ១លីត្រ ក្នុងមួយថ្ងៃ ហើយអ្នកខ្លះទៀតត្រូវធ្លាក់ខ្លួនដល់ថ្នាក់ដាំទឹកសមុទ្រ ខណៈដែលបណ្ដាអង្គការនានា ដូចជា WFP ជាដើម មិនអាចចូលទៅដល់តំបន់ដែលមនុស្ស ១,១លាននាក់ ត្រូវការអាហារយ៉ាងខ្លាំង។

អ៊ីស្រាអែលបាននិយាយកាលពីថ្ងៃអង្គារថា ខ្លួនបានសម្លាប់សកម្មប្រយុទ្ធរបស់ក្រុមហាម៉ាសរាប់សិបនាក់ ក្នុងការវាយប្រហារពេញមួយយប់លើតំបន់ហ្គាហ្សា ប៉ុន្តែថា សង្រ្គាមរបស់ខ្លួន ដើម្បីកំចាត់ក្រុមសកម្មប្រយុទ្ធទាំងនោះ ដែលពាក់ព័ន្ធនឹងការទម្លាក់គ្រាប់បែក និងការបិទខ្ទប់និគមជនក្រុមប៉ាឡេស្ទីន នឹងត្រូវចំណាយពេល។

យ៉ាងណាក្ដី អង្គការសហប្រជាជាតិបានជំរុញអ៊ីស្រាអែលអនុញ្ញាតឲ្យមានការផ្តល់ជំនួយបន្ថែមទៀតចូលទៅក្នុងតំបន់ហ្គាហ្សា ដោយលើកឡើងថា ជំនួយដែលបានអនុញ្ញាតរហូតមកដល់ពេលនេះ បានបំពេញតម្រូវការមួយចំនួនតូចប៉ុណ្ណោះ ហើយប្រេងឥន្ធនៈ ដែលនៅតែត្រូវបានរារាំងមិនឲ្យចូលនោះ មានសារៈសំខាន់ណាស់៕