ទូរទស្សន៍រដ្ឋប្រជុំកោះ Canaryបានរាយការណ៍ថា អេស្ប៉ាញ បានបញ្ជូនជនអន្តោប្រវេសន៍ពីកោះ Tenerife នៃប្រជុំកោះ Canary ទៅកាន់ទីក្រុង Madrid ។ 

រូបភាពវីដេអូឃ្លីប ឃើញជនអន្តោប្រវេសន៍រាប់រយនាក់ ឈរតម្រង់ជួរនៅអាកាសយានដ្ឋាន Tenerife North ។  

កោះចំនួន ៧នៅប្រជុំកោះស្ថិតក្នុងសមុទ្រអាត្លង់ទិកមួយនេះ បានក្លាយជាគោលដៅសំខាន់សម្រាប់ជនអន្តោប្រវេសន៍ដែលព្យាយាមធ្វើដំណើរទៅដល់ប្រទេសអេស្ប៉ាញ ហើយនៅក្នុងឆ្នាំនេះ មាននូវកំណើនការព្យាយាមឆ្លងកាត់ចេញពីប្រទេសសេណេហ្គាល់ និងប្រទេសផ្សេងទៀតនៅអាហ្វ្រិក ។ 

យោងតាមទិន្នន័យផ្លូវការ បានឲ្យដឹងថា នៅចន្លោះថ្ងៃទី ១ និងថ្ងៃទី ១៥ ខែតុលា ប្រជុំកោះមួយនេះ ទទួលបានជនអន្តោប្រវេសន៍ចំនួន ២៣.៥៣៧នាក់ ពោលគឺកើនឡើង ៨០ភាគរយ ធៀបនឹងរយៈពេលតែមួយកាលពីឆ្នាំមុន ។ 

 ដោយឡែក មនុស្សយ៉ាងហោច ១ពាន់នាក់ បានស្លាប់ អំឡុងពេលព្យាយាមឆ្លងកាត់សមុទ្រមកទល់នឹងពេលនេះ ក្នុងឆ្នាំនេះ ។ 

 សូមបញ្ជាក់ថា រដ្ឋមន្រ្តីស្តីទីនៃក្រសួងអន្តោប្រវេសន៍អេស្ប៉ាញ បានសន្យាកាលពីថ្ងៃទី ១៩ ខែតុលាកន្លងទៅថា នឹងផ្តល់កញ្ចប់ជំនួយ ៥៣លានដុល្លារ ដើម្បីជួយប្រជុំកោះ Canary ដោះស្រាយលំហូរជនអន្តោប្រវេសន៍ដ៏ច្រើនលើសលប់នេះ ៕