អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃអង្គារ ២៤តុលា បាន​ចោទ​ប្រកាន់ថាមានការរំលោភច្បាប់អន្តរជាតិនៅតំបន់ហ្កាហ្សា និងបាន​ជំរុញ​ឱ្យមា​ន​បទ​ឈប់​បាញ់​ជាបន្ទាន់ ស្របពេលអ៊ីស្រាអែលវាយលុកលើដែនដីប៉ាឡេស្ទីន ជាការឆ្លើយ​តប​ទៅ​នឹង​ការ​វាយ​ប្រហាររបស់ក្រុមហាម៉ាស ទន្ទឹមនឹងវិបត្តិ ដ៏ជ្រៅនៃការ​បែកបាក់​គ្នា​នៅ​ក្នុង​ក្រុម​ប្រឹក្សា​សន្តិសុខ។

អ៊ីស្រាអែលបានបង្ហាញការខឹងសម្បាចំពោះការអង្វរកររបស់ប្រមុខអង្គការសហប្រជាជាតិនៅមុនសម័យ​ប្រជុំជាន់ខ្ពស់នៃក្រុមប្រឹក្សាសន្តិសុខ ជាទីដែលរដ្ឋមន្ត្រីការបរទេសប៉ាឡេស្ទីន បានរិះគន់​ចំពោះ​អ្វី​ដែល​លោក​បាន​ហៅថា​ជាភាព​អសកម្ម​នៅ​ក្នុង​ជម្លោះ​ដែល​បាន​សម្លាប់​ភាគី​ទាំង​សង​ខាង​រាប់​ពាន់​នាក់ ដែលភាគច្រើនជាជនស៊ីវិល។ ក្នុងការបើកសម័យប្រជុំ លោក Guterres បាន​និយាយ​ថា ​ពុំមានលេសសម្រាប់អំពើហិង្សា គួរឱ្យរន្ធត់ ដោយពួកសកម្មប្រយុទ្ធហាម៉ាស កាល​ពី​ថ្ងៃ​ទី៧ ខែតុលា នោះទេ ប៉ុន្តែក៏បានព្រមានប្រឆាំងនឹង ការដាក់​ទណ្ឌកម្ម​រួម​លើ​ប៉ាឡេស្ទីន​ផង​ដែរ​។ 

លោក Guterres និយាយដោយមិនបញ្ចេញឈ្មោះអ៊ីស្រាអែលចំៗថា លោក​ព្រួយ​បារម្ភ​យ៉ាង​ខ្លាំង​ចំពោះ​ការ​រំលោភ​យ៉ាង​ច្បាស់​ក្រឡែត​នៃ​ច្បាប់​មនុស្សធម៌អន្តរជាតិដែលយើងកំពុងមើលឃើញ​នៅ​ក្នុង​តំបន់ហ្កាហ្សា។ លោកសូមបញ្ជាក់ឲ្យច្បាស់ថា  គ្មានភាគីជម្លោះប្រដាប់អាវុធណាមួយ​បំពាន​លើ​ច្បាប់មនុស្សធម៌​អន្តរជាតិបានឡើយ។      

សុន្ទរកថារបស់លោកបានធ្វើឱ្យរដ្ឋមន្ត្រីការបរទេសអ៊ីស្រាអែលលោក អ៊ីលី ខូហិន (Eli Cohen) ខឹង​សម្បាដែលចង្អុលទៅលោក Guterres និងដំឡើងសំឡេង ដែលបាន​រំលឹក​ឡើង​វិញ​នូវ​ការ​បាត់​បង់​អាយុជីវិតជនស៊ីវិលរួមទាំងកុមារតូចៗដែលត្រូវបានសម្លាប់កាលពីថ្ងៃទី ៧ ខែតុលា នៅ​ក្នុង​ការ​វាយប្រហារតែមួយដ៏សាហាវបំផុតក្នុងប្រវត្តិសាស្ត្រអ៊ីស្រាអែល។ ឯកអគ្គរដ្ឋ​ទូត​អ៊ីស្រាអែល​ប្រចាំ​អង្គការសហប្រជាជាតិ លោក ហ្គីលែន អឺដាន (Gilad Erdan) បានអំពាវនាវឱ្យលោក Guterres លាលែងពីតំណែង ដោយសរសេរនៅលើបណ្ដាញសង្គម X ថាប្រមុខ​អង្គការ​សហ​ប្រជាជាតិ​បាន បង្ហាញការយោគយល់ចំពោះអំពើភេរវកម្ម និងឃាតកម្ម៕