បន្ទាយមានជ័យ៖ ឯកឧត្ដមឧត្ដមសេនីយ៍ឯកបណ្ឌិត ណុប នរិន្ទ អគ្គនាយករងអន្តោប្រវេសន៍ នៅថ្ងៃទី២៥ខែតុលា ឆ្នាំ២០២៣ បានដឹកនាំក្រុមការងាររៀបចំប្រអប់សំបុត្ររបស់អគ្គនាយកដ្ឋានអន្តោប្រវេសន៍ បានចុះមកត្រួតពិនិត្យ និងបើកប្រអប់សំបុត្រ នៅប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ។

បន្ទាប់ពីបានបើកពិនិត្យ និងប្រមូលសំបុត្ររួចរាល់ឯកឧត្ដម ឧត្ដមសេនីយ៍ឯក បណ្ឌិត បាន​ជួប​សំណេះសំណាល​ជាមួយមន្ត្រីប៉ុស្តិ៍ និងក្រុមផ្ដល់ទិដ្ឋាការប្រចាំច្រកទ្វារព្រំដែន​អន្តរជាតិប៉ោយប៉ែត ព្រមទាំងបានពាំនាំនៅមតិផ្តាំផ្ញើសួរសុខទុក្ខរបស់ឯកឧត្តម ឧត្តមសេនីយ៍ឯក អគ្គនាយក​អន្តោប្រវេសន៍ ដល់មន្ត្រីប៉ុស្តិ៍ ​និងក្រុមផ្ដល់ទិដ្ឋាការ ព្រមទាំង​បានក្រើន​រំលឹកបន្ថែមអំពីការអនុវត្ត​កិច្ច​ការងារ​ជំនាញប្រចាំថ្ងៃ ​និងបានវាយតម្លៃខ្ពស់អំពីការសាមគ្គីភាពផ្ទៃក្នុង និង​ការគោរព​វិន័យរបស់មន្ត្រីប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត។

ក្នុងឱកាសនោះដែរ ឧត្ដមសេនីយ៍ឯកបណ្ឌិត ណុប នរិន្ទ បានកោតសរសើរដល់ថ្នាក់ដឹកនាំប៉ុស្តិ៍ ក្នុងការដឹកនាំគ្រប់គ្រងបានល្អ ​ហើយក៏ស្នើសុំឱ្យបន្តការគោរពវិន័យ និងសាមគ្គីផ្ទៃក្នុងឱ្យកាន់តែល្អ​ប្រសើរថែមទៀត ៕