អាមេរិក ៖ មន្ត្រីក្រសួងការពារជាតិអាមេរិក បានបញ្ជាក់ជាមួយសារព័ត៌មាន Fox News ថា មន្ទីរបញ្ចកោណ កំពុងស្ថិតក្នុងដំណាក់កាលរៀបចំផែនការបញ្ជូនប្រព័ន្ធការពារមីស៊ីល Iron Dome ទៅកាន់ប្រទេសអ៊ីស្រាអែល ខណៈដែលប្រទេសនេះ នៅតែបន្តការពារមីស៊ីលដែលបាញ់មកលើអ៊ីស្រាអែលពីតំបន់ហ្គាហ្សាស្ទ្រីប ដោយពួកភេរវករហាម៉ាស។

មន្ត្រីការពារជាតិរូបនេះ បាននិយាយថា៖«សហរដ្ឋអាមេរិក នឹងផ្តល់ជំនួយ Iron Dome បន្ថែមទៀតដល់អ៊ីស្រាអែល។ «ជាលទ្ធផល ក្រសួងការពារជាតិបច្ចុប្បន្ន កំពុងចូលរួមក្នុងផែនការគាំទ្រការផ្តល់ប្រព័ន្ធ   ការពារមីស៊ីល Iron Dome របស់អាមេរិក ដល់អ៊ីស្រាអែល»។

កាលពីថ្ងៃទី៧ ខែតុលា ក្រុមភេរវករហាម៉ាស បានធ្វើការវាយប្រហារគួរឲ្យភ្ញាក់ផ្អើលមួយលើអ៊ីស្រាអែល ដែលធ្វើឲ្យវាក្លាយជាការវាយប្រហារដ៏សាហាវបំផុតលើប្រទេសនេះ ក្នុងរយៈពេល៥០ឆ្នាំ។

ការវាយប្រហារនោះ រួមមានគ្រាប់រ៉ុក្កែតជាង៣.០០០គ្រាប់ យានដ្រូន និងការវាយឆ្មក់របស់កងកុម្មង់ ដូដែលកំណត់គោលដៅទៅលើទីក្រុង មូលដ្ឋានយោធា និងហេដ្ឋារចនាសម្ព័ន្ធរបស់អ៊ីស្រាអែល។

យោធាអ៊ីស្រាអែល បាននិយាយថា ប្រព័ន្ធការពារដែនអាកាសរបស់អ៊ីស្រាអែលគឺ Iron Dome អាចទប់ស្កាត់បានប្រហែល៩០ភាគរយនៃការគំរាមកំហែង ដែលនឹងចូលមកដល់នោះ។