អគ្គលេខាធិការអង្គការសហប្រជាជាតិ បានអំពាវនាវឱ្យមានបទឈប់បាញ់ជាបន្ទាន់ ដើម្បីបញ្ចប់ «ការរងទុក្ខវេទនាដ៏ធ្ងន់ធ្ងរ» នៅក្នុងតំបន់ហ្កាហ្សា ស្ទ្រីប បន្ទាប់ពីការវាយប្រហារតាមអាកាសរបស់អ៊ីស្រាអែល ដែលត្រូវបានគេរាយការណ៍ថា បានសម្លាប់មនុស្សជាង ៧០០នាក់ក្នុងមួយថ្ងៃ ហើយមន្ទីរពេទ្យនានាបានចាប់ផ្តើមបិទដោយសារតែកង្វះប្រេងឥន្ធនៈសម្រាប់ដំណើរការ។

លោក Antonio Guterres បាននិយាយថា ការទម្លាក់គ្រាប់បែក និងការបិទតំបន់ហ្កាហ្សា របស់អ៊ីស្រាអែល ស្មើនឹង «ការដាក់ទណ្ឌកម្មរួមលើប្រជាជនប៉ាឡេស្ទីន» និងបានរំលោភលើច្បាប់អន្តរជាតិ។ ការអត្ថាធិប្បាយរបស់លោក Guterres មួយនេះ បានបង្កឱ្យមានជម្លោះយ៉ាងខ្លាំងក្លាជាមួយអ៊ីស្រាអែល។

លោក Guterres បាននិយាយថា «ដើម្បីបន្ធូរបន្ថយទុក្ខវេទនាសម្រាប់ប្រជាជន និងធ្វើឱ្យការផ្តល់ជំនួយកាន់តែងាយស្រួល ព្រមទាំងមានសុវត្ថិភាព និងជួយសម្រួលដល់ការដោះលែងចំណាប់ថ្នូរ យើងសូមអំពាវនាវជាថ្មីម្តងទៀត ចំពោះបទឈប់បាញ់មនុស្សធម៌ជាបន្ទាន់»។

លោក Guterres បាននិយាយថា ការវាយប្រហារថ្ងៃទី៧ ខែតុលា ដោយក្រុមហាម៉ាស គឺជារឿងដ៏គួរឲ្យរន្ធត់ ប៉ុន្តែមិនបានពាក់ព័ន្ធដល់ប្រជាជនប៉ាឡេស្ទីនទាំងអស់នោះទេ។ បន្ទាប់ពីការអត្ថាធិប្បាយរបស់ប្រមុខអង្គការសហប្រជាជាតិរូបនេះ បេសកជនរបស់អ៊ីស្រាអែល ប្រចាំអង្គការសហប្រជាជាតិ លោក Gilad Erdan បានអំពាវនាវឱ្យលោក Guterres លាលែងពីតំណែងភ្លាមៗ ដោយចោទប្រកាន់លោកថាមានទស្សនៈផ្ទុយពីការពិត ព្រមទាំងបង្កើតយុត្តិកម្មសម្រាប់អំពើភេរវកម្ម និងឃាតកម្មផងដែរ៕