ចិន ៖ ទីភ្នាក់ងារអវកាសចិន (CMSA) បានប្រកាសនៅក្នុងសន្និសីទសារព័ត៌មានមួយនៅថ្ងៃពុធនេះថា យានអវកាស ស៊ិនចូវ -១៧ (Shenzhou-17) នឹងត្រូវបាញ់បង្ហោះនៅម៉ោង១១និង១៤នាទី ព្រឹកថ្ងៃព្រហស្បតិ៍ស្អែកនេះ ម៉ោងនៅទីក្រុងប៉េកាំងពីមជ្ឈមណ្ឌលបាញ់បង្ហោះផ្កាយរណប ជីវជ័ន (Jiuquan) នៅភាគពាយព្យប្រទេសចិន។  

ទីភ្នាក់ងារនេះ បាននិយាយថា អវកាសយានិកចិន លោក តាំងហុងបូ (Tang Hongbo) លោក តាំង សឹងជី (Tang Shengjie) និងលោកជ័ងស៊ីនលីន (Jiang Xinlin) នឹងបំពេញបេសកកម្មទៅកាន់ស្ថានីយ៍អវកាសចិន (CSS) ។      

ក្រុមអវកាសយានិកនៃយានអវកាសស៊ិនចូវ -១៧ (Shenzhou-17)នឹងស្វាគមន៍ការមកទស្សនា និងការចុះចតយានអវកាសដឹកទំនិញធានចូវ-៧ (Tianzhou-7) និងយានអវកាស ស៊ិនចូវ -១៨ (Shenzhou-18) ផ្ទុកអវកាសយានិក ក្នុងអំឡុងបេសកកម្មរបស់ពួកគេ ហើយគ្រោងនឹងត្រឡប់ទៅកន្លែងចុះចតលើភពផែនដី តុងហ្វឹង(Dongfeng) នៅវាលខ្សាច់ ហ្គ័រប៊ី (Gobi) តំបន់ស្វយ័តម៉ុងហ្គោលីខាងក្នុង ភាគខាងជើងប្រទេសចិន នៅខែមេសាខាងមុខ។    

ក្រុមសមាជិកអាវកាសយានិកនៃយានស៊ិនចូវ-១៦ (Shenzhou-16) របស់ចិន ដែលបានស្ថិតនៅក្នុងគន្លងតារាវិថីស្ថានីយអវកាស ធាង ហ្គុង (Tiangong) អស់រយៈពេលជិតប្រាំខែនោះ គ្រោងនឹងត្រឡប់មកកាន់ភពផែនដីវិញ បន្ទាប់ពីប្រគល់ការងាររបស់ពួកគេឲ្យទៅក្រុមអវកាយានិកនៃយានស៊ិនចូវ-១៧ (Shenzhou-17)៕