ភ្នំពេញ ៖ ឯកឧត្តមអគ្គនាយកផ្សារមូលបត្រកម្ពុជា លើកឡើងថា ដោយសារការកើនឡើងសន្ទុះនៃចំនួនវិនិយោគិនប្រមាណ ៤០% (ប្រមាណ ១,៣ម៉ឺនគណនី) ហើយនឹងរំពឹងថា ការស្នើសុំបើកគណនីដើម្បីធ្វើការជួញដូរភាគហ៊ុន អាចនឹងកើនឡើងបន្ថែមទៀតប្រមាណ១០០% (ប្រមាណ ៣ទៅ៥ម៉ឺនគណនី) នៅឆ្នាំ២០២៤ខាងមុខ បន្ទាប់ពីដាក់ឱ្យប្រើប្រាស់ប្រព័ន្ធបើកគណនីជួញដូរតាមអនឡាញ។

​ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា ក្នុងពិធីចុះកិច្ចព្រមព្រៀងស្តីពី តំណភ្ជាប់ប្រព័ន្ធផ្តល់លេខអត្តសញ្ញាណវិនិយោគិន និងប្រព័ន្ធបើកគណនីជួញដូរតាមអនឡាញ កាលពីព្រឹកថ្ងៃទី២៥ ខែតុលានេះ បានមានប្រសាសន៍ឲ្យដឹងថា ចាប់ពីដើមឆ្នាំរហូតដល់ដំណាច់ឆ្នាំ២០២៣នេះ យើងនឹងទទួលបានវិនិយោគិនថ្មីសរុបប្រមាណ ១៣ ០០០នាក់ ប៉ុន្តែនៅឆ្នាំ២០២៤ យើងរំពឹងថា នឹងទទួលបានវិនិយោគិនថ្មីកើនឡើងបន្ថែមទៀត បន្ទាប់ពីវិនិយោគិនអាចបើកគណនីតាមអនឡាញបានដោយងាយស្រួល។ ឯកឧត្តម បានបន្តថា ការកើនឡើងនូវចំនួនវិនិយោគិនដ៏ច្រើននេះ នឹងតម្រូវឱ្យទីផ្សារមូលបត្រកម្ពុជា ត្រៀមខ្លួនឱ្យបានល្អក្នុងការទទួលពួកគាត់។ 

ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃនិយ័តករមូលបត្រកម្ពុជា បានបញ្ជាក់ឲ្យដឹងដែរថា ការបើកគណនីជួញដូរមូលបត្រតាមអនឡាញ ដែលគ្រោងនឹងប្រកាសនៅថ្ងៃទី១៦ ខែវិច្ឆិកា ឆ្នាំ២០២៣ខាងមុខនេះ គឺជាផ្នែកមួយនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលថ្មី ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ ឯកឧត្តមលើកឡើងថា តាមរយៈបរិបទនិន្នាការថ្មីនេះ វិស័យមូលបត្រនៅកម្ពុជា ក៏បានធ្វើទំនើបកម្ម តាមរយៈការដាក់ឱ្យដំណើរការប្រព័ន្ធផ្តល់លេខអត្តសញ្ញាណវិនិយោគិនតាមអនឡាញ ការជួញដូរតាមប្រព័ន្ធបច្ចេកវិទ្យាឌីជីថល CSX Trade ការផ្ទេរប្រាក់តាម Mobile App ជាដើម ហើយឆាប់ៗនេះ យើងនឹងមានប្រព័ន្ធបើកគណនីជួញដូរតាមអនឡាញ។

សូមជម្រាបជូនថា កិច្ចព្រមព្រៀងស្តីពី តំណភ្ជាប់ប្រព័ន្ធផ្តល់លេខអត្តសញ្ញាណវិនិយោគិន និងប្រព័ន្ធបើកគណនីជួញដូរតាមអនឡាញ រវាងនិយ័តករមូលបត្រកម្ពុជា និងផ្សារមូលបត្រកម្ពុជា នៅថ្ងៃនេះ នឹងបង្កើតឱ្យមានការបើកគណនីជួញដូរបានភ្លាមៗ ពិសេស គឺការបើកគណនីជួញដូរតាមអនឡាញ។ ការតភ្ជាប់នេះ បានបង្កើតនូវភាពពេញលេញនូវការបង្កើតប្រព័ន្ធបើកគណនីជួញដូរតាមអនឡាញ ដោយវិនិយោគិនអាចស្នើសុំលេខអត្តសញ្ញាណវិនិយោគិន និងបើកគណនីក្នុងប្រព័ន្ធតែមួយបានឆាប់រហ័ស។ វិនិយោគិន នឹងទទួលបានគណនីជួញដូរមូលបត្របានដោយភ្លាមៗ និងមានប្រសិទ្ធិភាពខ្ពស់។ បន្ទាប់ពីបានគណនី វិនិយោគិនអាចដាក់ប្រាក់ចូលគណនីជួញដូរ និងចាប់ផ្តើមវិនិយោគបានភ្លាមៗតែម្តង៕ ដោយ ៖ បូរ៉ាវី