ជោគវាសនានៃបេសកកម្មសន្តិសុខពហុជាតិដឹកនាំដោយកេនយ៉ា ដើម្បីជួយនគរបាលរបស់ប្រទេសហៃទីក្នុងការកម្ទេចក្រុមប្រដាប់អាវុធដ៏គ្រោះថ្នាក់ នៅតែមិនប្រាកដប្រជា បន្ទាប់ពីតុលាការនៅប្រទេសកេនយ៉ាកាលពីថ្ងៃអង្គារ បានបន្តបញ្ជារបស់ខ្លួន ដែលរារាំងការដាក់ពង្រាយរយៈពេលពីរសប្តាហ៍ទៀត។

កាលពីដើមខែនេះ តុលាការកំពូលនៅប្រទេសកេនយ៉ា បានរារាំងការដាក់ពង្រាយណាមួយ រហូតដល់ថ្ងៃទី ២៤ខែតុលា ដើម្បីស្តាប់ការជំទាស់របស់អតីតបេក្ខជនប្រធានាធិបតី Ekuru Aukot ដែលបានដាក់ញត្តិដោយនិយាយថា សំណើរបស់ប្រទេសកេនយ៉ា ដើម្បីជួយប្រទេសហៃទីមិនស្របតាមរដ្ឋធម្មនុញ្ញរបស់ប្រទេសនេះទេ។

លោក Aukot និងក្រុមប្រឆាំងសំណើរបស់លោកប្រធានាធិបតី វីល្លៀម រ៉ូតូ (William Ruto) រិះគន់ប្រធានាធិបតីចំពោះការយល់ព្រមបញ្ជូនកងកម្លាំងសន្តិសុខកេនយ៉ា ១.000 នាក់ទៅកាន់ប្រទេសហៃទី នៅពេលដែលប្រទេសកេនយ៉ា កំពុងដោះស្រាយជាមួយនឹងការវាយប្រហារដោយសកម្មប្រយុទ្ធ និងការប៉ះទង្គិចជនជាតិភាគតិចដែរនោះ។

តុលាការជាន់ខ្ពស់ បាននិយាយថា ឥឡូវនេះ ខ្លួននឹងសម្រេចលើសំណុំរឿងនេះ នៅថ្ងៃទី៩ ខែវិច្ឆិកា ដែលបន្តភាពមិនច្បាស់លាស់ ខណៈដែលអំពើហិង្សារបស់ក្រុមជនអន្ធពាល នៅក្នុងប្រទេសហៃទី នៅតែបន្តកាន់តែអាក្រក់ទៅៗ។ ការដាក់ពង្រាយនេះ មិនទាន់ត្រូវបានបោះឆ្នោតដោយសភាជាតិរបស់ប្រទេសកេនយ៉ា នៅឡើយទេ។