ប្រទេសបង់ក្លាដែស បានចាប់ផ្តើមជម្លៀសពលរដ្ឋរាប់លាននាក់ ខណៈព្យុះស៊ីក្លូន Hamoon ដ៏គ្រោះថ្នាក់ កំពុងខិតមកជិតប្រទេសនៅអាស៊ីខាងត្បូងមួយនេះ។ ក្រសួងឧតុនិយមប្រទេសបង់ក្លាដែស ដែលបានចេញការប្រកាសពីអាកាសធាតុពិសេស បាននិយាយថា ស្ថិតនៅក្រោមឥទ្ធិពលរបស់ព្យុះស៊ីក្លូន អាកាសធាតុព្យុះ អាចប៉ះពាល់នៅជ្រោយភាគខាងជើង ដែលប្រសព្វគ្នាជាមួយតំបន់ឆ្នេរនៅប្រទេសបង់ក្លាដែស និងកំពង់ផែសមុទ្រ។ 

បន្ទាប់ពីកិច្ចប្រជុំបន្ទាន់មួយ របស់គណៈកម្មការអនុវត្តកម្មវិធីការត្រៀមទប់ទល់ព្យុះស៊ីក្លូន នៅក្នុងទីក្រុង Dhaka រដ្ឋមន្ត្រីរដ្ឋទទួលបន្ទុកគ្រប់គ្រងគ្រោះមហន្តរាយ និងជំនួយសង្គ្រោះបន្ទាន់ របស់ប្រទេសបង់ក្លាដែស លោក Md Enamur Rahman បាននិយាយថា កិច្ចប្រជុំបានសម្រេចថា នឹងត្រូវជម្លៀសពលរដ្ឋនៅក្នុងតំបន់ដែលងាយរងគ្រោះ ទៅកាន់ទីជម្រកនានា នៅពេលសញ្ញាគ្រោះថ្នាក់ទី៧ ត្រូវបានចេញ។

លោក Rahman និយាយថា មនុស្សយ៉ាងហោចណាស់ ១,៥ លាននាក់ មកពីស្រុកដែលងាយរងគ្រោះបំផុតចំនួន១០ នឹងត្រូវជម្លៀសទៅកាន់ទីជម្រក។

សមាជិកមកពី កងទ័ពជើងទឹក ឆ្មាំល្បាតឆ្នេរ នគរបាល អង្គការស្ម័គ្រចិត្ត និងគណបក្សនយោបាយរបស់ប្រទេសបង់ក្លាដែស កំពុងជួយគាំទ្រ កិច្ចប្រឹងប្រែងជម្លៀសដ៏ធំនេះ។

ការរាយការណ៍តាមទូរទស្សន៍ បាននិយាយថា ស្រុកជាច្រើននៅតំបន់ឆ្នេរភាគអាគ្នេយ៍ និងភាគខាងត្បូង បានជួបប្រទះព្យុះធូលី ចាប់តាំងពីព្រឹកថ្ងៃអង្គារ ខណៈព្យុះស៊ីក្លូនកំពុងខិតជិតមកដល់។

រដ្ឋមន្ត្រី គ្រប់គ្រងគ្រោះមហន្តរាយ និងជំនួយសង្គ្រោះបន្ទាន់ប្រទេសបង់ក្លាដែស លោក Kamrul Hasan បន្ទាប់ពីកិច្ចប្រជុំនៅក្រសួងកាលពីថ្ងៃអង្គារ បាននិយាយថា ក្រុមមន្ត្រី បានត្រៀមទប់ទល់អស់ពីសមត្ថភាព ដើម្បីដោះស្រាយការបំផ្លាញដោយព្យុះស៊ីក្លូន។