រូបភាពវីដេអូឃ្លីបពីទីភ្នាក់ងារព័ត៌មានរ៉យទ័រ ឃើញផ្លូវថ្នល់គ្មានមនុស្សដើរ ហើយតំបន់ឆ្នេរត្រូវបានគេទុកចោលនៅតំបន់ភាគខាងត្បូងប្រទេសអ៊ីស្រាអែលនាថ្ងៃពុធនេះ ។

យោធាអ៊ីស្រាអែល បានបង្កើនការទម្លាក់គ្រាប់បែករបស់ពួកគេលើតំបន់ភាគខាងត្បូងហ្គាហ្សា កាលពីយប់កន្លងទៅ ក្រោយថ្ងៃស្លាប់មនុស្សច្រើនបំផុតសម្រាប់ជនប៉ាឡេស្ទីន ចាប់តាំងពីជម្លោះបានផ្ទុះឡើង ស្របពេលដែលក្រុមមេដឹកនាំពិភពលោក បានអំពាវនាវឲ្យបញ្ឈប់សង្រ្គាម ដើម្បីអនុញ្ញាតឲ្យជំនួយចូលទៅក្នុងតំបន់ឡោមព័ទ្ធមួយនេះ ។

ក្រសួងសុខាភិបាលនៅក្នុងតំបន់ហ្គាហ្សាគ្រប់គ្រងដោយក្រុមហាម៉ាស់ និយាយថា ជនប៉ាឡេស្ទីនសរុប ៧០៤នាក់ ដែលរួមទាំងកុមារ ៣០៥នាក់ ត្រូវបានសម្លាប់កាលពីថ្ងៃអង្គារម្សិលមិញ គឺជាចំនួនមនុស្សស្លាប់សរុប ដែលការិយាល័យទទួលបន្ទុកការសម្របសម្រួលកិច្ចការមនុស្សធម៌អង្គការសហប្រជាជាតិ និយាយថា គឺជាចំនួនមនុស្សស្លាប់ច្រើនបំផុតក្នុងរយៈពេល ១ថ្ងៃ ចាប់តាំងពីសង្រ្គាមបានផ្ទុះឡើងកាលពីរយៈពេលជិត ៣សប្តាហ៍មុន ។

អ៊ីស្រាអែល បានបើកការវាយប្រហារលើតំបន់ហ្គាហ្សា ក្រោយក្រុមជីវពលហាម៉ាស់ វាយប្រហារទីក្រុងភាគខាងត្បូងអ៊ីស្រាអែល កាលពីថ្ងៃទី ៧ ខែតុលាកន្លងទៅ ដែលបានសម្លាប់ជនជាតិអ៊ីស្រាអែលជាង ១.៤០០នាក់ ។

ដោយឡែក ស៊ីរ៉ែនព្រមានពីគ្រាប់រ៉ុក្កែតបានបន្លឺឡើងនៅទីក្រុងតែល អាវីវ របស់ប្រទេសអ៊ីស្រាអែល ខណៈដែលសង្រ្គាមរវាងអ៊ីស្រាអែល និងក្រុមហាម៉ាស់ នៅតែបន្ត រយៈពេល ១៧ថ្ងៃក្រោយចាប់ផ្តើមជម្លោះ ។

យោងតាមសារព័ត៌មានក្នុងស្រុក បានឲ្យដឹងថា ស៊ីរ៉ែន បានបន្លឺឡើងនៅតាមទីក្រុងជាច្រើនទៀតផងដែរ នៅភាគកណ្តាលអ៊ីស្រាអែល ។ រូបភាពវីដេអូឃ្លីបរបស់ទីភ្នាក់ងារព័ត៌មានរ៉យទ័រ ឃើញការបាញ់ស្កាត់របស់ប្រព័ន្ធការពារដែនអាកាស Iron Dome ហើយនិងការផ្ទុះ ពេលដែលស៊ីរ៉ែន បន្លឺឡើង ។ មកទល់នឹងពេលនេះ ពុំទាន់មានសេចក្តីរាយការណ៍ពីការខូងខាត ឬគ្រោះថ្នាក់នោះទេ ពីការវាយប្រហារដោយគ្រាប់រ៉ុក្កែតនេះ ៕