ប្រទេសអូស្ត្រាលី បាននិយាយកាលពីថ្ងៃពុធថា ខ្លួនបានដាក់ពង្រាយយន្តហោះយោធាពីរគ្រឿងបន្ថែមទៀត និង បុគ្គលិកការពារជាតិ«មួយចំនួនធំ» ទៅកាន់មជ្ឈិមបូព៌ា ដើម្បីជួយគាំទ្រដល់ពលរដ្ឋរបស់ខ្លួននៅទីនោះ ប្រសិនបើសង្គ្រាមដែលកំពុងបន្តរវាងអ៊ីស្រាអែល និងក្រុមសកម្មប្រយុទ្ធហាម៉ាស កាន់តែកើន      ឡើង។

ការវាយប្រហារឆ្លងព្រំដែនដ៏សាហាវដោយក្រុមហាម៉ាស ដែលគាំទ្រដោយអ៊ីរ៉ង់ កាលពីថ្ងៃទី៧ ខែតុលា បានធ្វើឲ្យអ៊ីស្រាអែលភ្ញាក់ផ្អើល ដោយបានសម្លាប់មនុស្សជាង១.៤០០នាក់ ខណៈដែលក្រសួងសុខាភិបាលប៉ាឡេស្ទីន បាននិយាយថា យ៉ាងហោចណាស់ប្រជាជនប៉ាឡេស្ទីនចំនួន៥.៧៩១នាក់ ត្រូវបានសម្លាប់ដោយការទម្លាក់គ្រាប់បែកជាបន្តបន្ទាប់របស់អ៊ីស្រាអែល រួមទាំងកុមារចំនួន ២.៣៦០នាក់។

រដ្ឋមន្ត្រីក្រសួងការពារជាតិ លោក Richard Marles បាននិយាយថា ប្រទេសអូស្ត្រាលី បានបញ្ជូនយន្តហោះ Boeing C-17 និងយន្តហោះចាក់សាំង ដែលមានសមត្ថភាពផ្ទុកអ្នកដំណើរបានច្រើន ដោយបាននាំឲ្យចំនួនសរុបដល់ទៅបីគ្រឿង។

លោក មិនបានបង្ហាញពីចំនួនបុគ្គលិកសរុបដែលត្រូវបានដាក់ពង្រាយ និងកន្លែងដែលយន្តហោះ នឹងត្រូវផ្អែកលើហេតុផលសន្តិសុខ ប៉ុន្តែបាននិយាយថា ពួកគេនឹងមិនមានទីតាំងនៅប្រទេសអ៊ីស្រាអែលទេ។