ចាប់តាំងពីរុស្ស៊ីចូលលុកលុយអ៊ុយក្រែន សហរដ្ឋអាមេរិកបានព្យាយាមដាក់ក្រុងម៉ូស្គូឲ្យនៅឯកា និងដាក់សម្ពាធមិនឲ្យចិនចូលទៅទៅមានទំនាក់ទំនងជាមួយ។ ដូចច្នេះ ជាមួយនឹងសង្គ្រាមនៅមជ្ឈិមបូព៌ា ទាំងប្រទេសរុស្ស៊ី និងចិន កំពុងស្វែងរកការកែប្រែនូវឥទ្ធិពលរបស់សហរដ្ឋអាមេរិក។

អាមេរិកបានចាត់ទុករុស្ស៊ីថា ជាអ្នកធ្វើឲ្យសណ្តាប់ធ្នាប់អន្តរជាតិរញ៉េរញ៉ៃ នៅឯក្រុមប្រឹក្សាសន្តិសុខអង្គការសហប្រជាជាតិ ដោយលោកប្រធានាធិបតី Joe Biden សន្យាជាមួយស្ថាប័នពិភពលោកនេះថា ទីក្រុងវ៉ាស៊ីនតោននឹងប្រើប្រាស់សិទ្ធិវេតូរបស់ខ្លួនដោយប្រុងប្រយ័ត្ន។ ប៉ុន្តែសហរដ្ឋអាមេរិក បានបន្តទៅមុខ និងបានវេតូសេចក្តីសម្រេចព្រាង កាលពីសប្តាហ៍មុន ដែលខ្លួនចាត់ទុកថា មិនមានការគាំទ្រគ្រប់គ្រាន់ដល់សម្ព័ន្ធមិត្តរបស់ខ្លួន។

នៅក្នុងការអត្ថាធិប្បាយ ដែលទំនងជាសំដៅលើការប្រព្រឹត្តនៅក្នុងពិភពអ៊ីស្លាម រុស្ស៊ីបានចោទប្រកាន់អាមេរិកថា បានធ្វើឲ្យជម្លោះកាន់តែឡើងកម្ដៅ តាមរយៈការពង្រឹងកម្លាំងយោធា ខណៈដែលចិនបានរិះគន់ចំពោះការប្រើសិទ្ធិវេតូរបស់អាមេរិក និងសកម្មភាពរបស់អ៊ីស្រាអែល។

ការនិយាយថ្កោលទោសរបស់ចិន និងរុស្ស៊ី ទំនងជាមិនមានន័យអ្វី សម្រាប់មន្ត្រីអាមេរិក ដែលមានមន្ទិលសង្ស័យថា តើប្រទេសមហាអំណាចគូប្រជែងទាំងនេះ នឹងចូលរួមក្នុងការសកម្មភាពការទូតយ៉ាងទៀងទាត់ ដូចនឹងការធ្វើដំណើរនាពេលថ្មីៗនេះរបស់រដ្ឋមន្ត្រីការបរទេសអាមេរិកលោក Antony Blinken ទៅកាន់តំបន់នេះដែរ ឬទេ។

ប៉ុន្តែសហរដ្ឋអាមេរិកបានបង្ហាញភាពលេចធ្លោជាប្រវត្តិសាស្ត្រ ក្នុងនាមជាអ្នកផ្ដល់សំឡេងតែឯងលើការគាំទ្រឥតងាករេដល់អ៊ីស្រាអែល បើទោះបីជាបច្ចុប្បន្នសម្ព័ន្ធមិត្តអឺរ៉ុបភាគច្រើន ចូលរួមជាមួយលោក Biden ក្នុងការគាំទ្រអ៊ីស្រាអែលក៏ដោយ៕