សភាតំណាងរាស្រ្តអាមេរិក បានបោះឆ្នោតជ្រើសរើសលោក ម៉ៃ ចនសុន (Mike Johnson) មក​ពី​គណបក្សសាធារណរដ្ឋ ដែលជាអ្នកអភិរក្សនិយមមានបទពិសោធន៍ដឹកនាំតិចតួច ជា​ប្រធាន​សភា​អា​មេរិកថ្មី កាលពីថ្ងៃពុធ (២៥ តុលា) ដោយបញ្ចប់ភាពជាប់គាំងរយៈពេល ៣សប្តាហ៍ ដែល​ធ្វើ​ឲ្យអង្គនីតិបញ្ញត្តិមួយនេះ មិនអាចបំពេញមុខងារជាមូលដ្ឋានណាមួយបាន។

ការបោះ​ឆ្នោត​តាមជួរគណបក្សដោយមានការគាំទ្រ ២២០សំឡេងទល់នឹង ២០៩សំឡេង បាន​ធ្វើ​ឲ្យ​លោក Johnson ទទួលជ័យជម្នះក្នុងមុខតំណែងដ៏មានឥទ្ធិពល ដែលនៅទំនេរ ចាប់​តាំង​ពី​អតីត​ប្រធាន​សភា លោក Kevin McCarthy ត្រូវបានបណ្តេញចេញពីតំណែងកាលពីថ្ងៃទី៣ ខែ​តុលា ដោយសមាជិកសភាមួយចំនួនតូចនៃសមាជិកគណបក្សសាធារណរដ្ឋ របស់លោកមក។

លោក Johnson វ័យ ៥១ឆ្នាំបានថ្លែងភ្លាមៗបន្ទាប់ពីឈ្នះតំណែងប្រធានសភានេះថា «យើង​ចង់​ឱ្យ​សម្ព័ន្ធ​មិត្តរបស់យើងនៅជុំវិញពិភពលោកដឹងថា ស្ថាប័នសភាមួយនេះ កំពុងរាយ​ការណ៍​ម្តង​ទៀត​ទៅ​កាន់មូលដ្ឋានកាតព្វកិច្ចរបស់យើង»។

សកម្មភាពដំបូងរបស់ប្រធានសភាអាមេរិកថ្មីរូបនេះ គឺអំពាវនាវឱ្យ​មាន​ច្បាប់​ដើម្បី​បង្ហាញ​ការ​គាំទ្រ​ដល់​អ៊ីស្រាអែល ដែលបានបង្កើនការទម្លាក់គ្រាប់បែករបស់ខ្លួននៅតំបន់ហ្កាហ្សា បន្ទាប់​ពី​ការ​សម្លាប់​ឆ្លង​ព្រំដែន និងការចាប់ជំរិតដោយពួកសកម្មប្រយុទ្ធហាម៉ាស កាលពីដើមខែនេះ។ នៅ​ក្នុង​លិខិតទៅកាន់បណ្ដាសមាជិកសភា លោក Johnson បានប្តេជ្ញា​ជំរុញ​ច្បាប់​ចំណាយ​ហួស​កាល​កំណត់ និងធានាថា រដ្ឋាភិបាលសហរដ្ឋអាមេរិក នឹងមិនបិទដំណើរការនោះទេ នៅពេល​ដែល​ការ​ផ្តល់​មូល​និធិបច្ចុប្បន្នផុតកំណត់នៅថ្ងៃទី១៧ ខែវិច្ឆិកា ខាងមុខនេះ៕