អ៊ីស្រាអែល បានបន្តការវាយប្រហារតាមអាកាសរបស់ខ្លួនលើគោលដៅក្រុមហាម៉ាស នៅតំបន់​ហ្កាហ្សា ខណៈប្រទេសនេះបានត្រៀមលក្ខណៈសម្រាប់ការវាយលុយតាមដីគោក និង​ជន​ស៊ីវិល​ប៉ាឡេស្ទីន កាន់តែច្រើនត្រូវបានសម្លាប់ ហើយបណ្ដា​មហា​អំណាច​ពិភពលោក​នៅ​អង្គការ​សហ​ប្រជាជាតិ បរាជ័យ​ក្នុង​ការ​ទទួល​បានផែនការផ្តល់ជំនួយមនុស្សធម៌​ដ៏សំខាន់ សម្រាប់​តំបន់​ហ៊ុមព័ទ្ធ​មួយនេះ។

ប្រធានាធិបតីអាមេរិក លោក Joe Biden បានថ្លែងកាលពីថ្ងៃពុធ (២៥ តុលា) នៅក្នុង​សុន្ទរកថា​ដោយ​សម្លឹង​មើលផ្លូវទៅមុខបន្ទាប់ពីសង្គ្រាម ដែលបានចាប់ផ្តើមជាមួយនឹងការវាយប្រហារ​កាលពី​ថ្ងៃ​ទី៧ ខែតុលា លើអ៊ីស្រាអែលដោយក្រុមសកម្មប្រយុទ្ធប៉ាឡេស្ទីនហាម៉ាសថា នៅពេលអនាគត គួរតែ​មានការដាក់បញ្ចូលរដ្ឋអ៊ីស្រាអែល និងរដ្ឋប៉ាឡេស្ទីន ដាច់ដោយឡែកពីគ្នា ដែល​សំដៅ​ទៅ​លើ​ដំណោះស្រា​យរដ្ឋពីរ។

អ៊ីស្រាអែល បានប្តេជ្ញាថា នឹងកម្ចាត់ក្រុមហាម៉ាស ដែលគ្រប់គ្រងតំបន់ហ្កាហ្សា នេះឲ្យបាត់​ពី​ផែន​ដី ខណៈលោកនាយករដ្ឋមន្ត្រី Benjamin Netanyahu បាននិយាយនៅ​ក្នុង​សេចក្តី​ថ្លែង​ការណ៍​តាម​ទូរទស្សន៍មួយថា អ៊ីស្រាអែល «កំពុងរៀបចំសម្រាប់ការវាយលុយថ្មើរជើង» ប៉ុន្តែនឹង​មិន​បញ្ជាក់​លម្អិត​ថា នៅពេលណា មធ្យោបាយណា ឬវាយលុកចំនួនប៉ុន្មានដងនោះទេ។

នៅមុនសេចក្តីថ្លែងការណ៍នោះ សារព័ត៌មាន WSJ ដែលដកស្រង់សម្តីក្រុមមន្ត្រីអាមេរិក និង​អ៊ីស្រាអែល បានរាយការណ៍ថា អ៊ីស្រាអែល បានយល់ព្រម​ពន្យា​រ​ពេល​ការ​ឈ្លាន​ពាន​តំបន់​ហ្កាហ្សា សម្រាប់ពេលនេះ ដើម្បីឲ្យសហរដ្ឋអាមេរិក អាចប្រញាប់ប្រញាល់បញ្ចូនមីស៊ីល ទៅកាន់​តំបន់​ដើម្បី​ការពារកងកម្លាំងអាមេរិកនៅទីនោះ ដោយឆ្លុះបញ្ចាំងពីការព្រួយបារម្ភរបស់ខ្លួនថា សង្រ្គាម​នៅ​តំបន់ហ្កាហ្សា អាចនឹងរីករាលដាលទៅផ្នែកផ្សេងទៀតនៃមជ្ឈឹមបូព៌ាផងដែរ៕