មនុស្សជាច្រើនកំពុងសម្រុកទៅទស្សនា ល្ពៅអបអរពិធីបុណ្យ Halloween រាប់ពាន់ផ្លែ ដែល​ត្រូវ​បាន​ឆ្លាក់​យ៉ាងវិចិត្រ និងបំភ្លឺពេលរាត្រីដ៏ស្រស់ត្រកាលនៅលើភ្នំ Santa Monica ក្បែរទីក្រុង Los Angeles សហរដ្ឋអាមេរិក។ 

ដោយត្រូវ​បានគេឲ្យឈ្មោះថា "Nights of the Jack" ព្រឹត្តិការណ៍នេះគឺ​ជាទឹក​ដី​អច្ឆរិយ នៃ​ពិធី​បុណ្យ ​Halloween ដែលមានគ្រប់បែបយ៉ាងចាប់ពីដាយណូស័រ និងមនុស្សក្រៅភព រហូត​ដល់​រូប​ចម្លាក់ SpongeBob SquarePants និងរូបតារាហូលីវូដដែលឆ្លាក់នៅលើល្ពៅ។   

ផលិតករកម្មវិធីនេះលោក តូបៀស ដានីញែល (Tobias Daniels) បានប្រាប់ សារ​ព័ត៌មាន​Reuters​ ថា អ្វីគ្រប់យ៉ាងដែលកំពុងដាក់បង្ហាញនេះ គឺធ្វើឡើងពីចង្កៀងគោម jack-o-lanterns ដូ​ច្នេះមិនថាអ្នកកំពុងដើរកាត់នៅលើដីដែលណូស័រឆ្លងកាត់សម័យ សត្វដាយណូស័ ជូរ៉ាស៊ីក (Jurassic) ហើយអ្នកកំពុងគយគន់សត្វដាយណូស័រ ត្រាយស័ររ៉េថប់(Triceratops) ឬ T-Rex ទេ ពួកវាទាំងអស់ សុទ្ធតែត្រូវបានបង្កើតឡើងដោយចង្កៀងគោមប្រភេទនេះទាំងអស់។

"Nights of the Jack" អនុញ្ញាតឱ្យអ្នកទស្សនាដើរគយគន់ទិដ្ឋភាពនេះលើផ្លូវចម្ងាយមួយ ម៉ាយល៍​ តាមរយៈការបង្ហាញប្រធានបទជាច្រើនដែលធ្វើពីល្ពៅ។ ព្រះនាង Disney, ព្រះនាង Alice នៅក្នុងអាណាចក្រអច្ឆរិយ ក៏ដូចជាខ្មោច Halloween និង បិសាច តាមប្រពៃណី គឺជាផ្នែក​មួយ​ នៃ​ព្រឹត្តិការណ៍បំភ្លឺនៅតំបន់ភ្នំ King Gillette Ranch ។

ព្រឹត្តិការណ៍​នេះ ប្រើប្រាស់ល្ពៅពីបួន​ទៅប្រាំពាន់​ផ្លែ​ សម្រាប់​ការតាំង​បង្ហាញ​ហើយ​ត្រូវ​ចំណាយ​ពេល​ប្រហែល ២៥ នាទីដើម្បីដើរគយគន់។ 

ការបង្ហាញព្រឹត្តិការណ៍បុណ្យ Halloweenនេះនឹងបើករហូតដល់ថ្ងៃទី១ ខែវិច្ឆិកា៕