ស្ថានទូតនៅក្នុងទីក្រុង Ottawa បានប្រកាសកាលពីថ្ងៃពុធថា ប្រទេសឥណ្ឌា នឹងបើកឡើងវិញ សេវា​ផ្តល់ទិដ្ឋាការសម្រាប់ពលរដ្ឋកាណាដា ជាចំណាត់ការមួយដែលអាចបន្ធូរបន្ថយភាពតានតឹង នៅ​ក្នុង​ជម្លោះដ៏ខ្លាំងជុំវិញឃាតកម្មអ្នកផ្តាច់ខ្លួនសាសនាស៊ីកម្នាក់នៅលើទឹកដីកាណាដា។

ទំនាក់​ទំនងរវាងប្រទេសឥណ្ឌា និងកាណាដា បានធ្លាក់ចុះ បន្ទាប់ពីនាយករដ្ឋមន្ត្រី លោក Justin Trudeau កាលពីខែមុន បានដាក់​ការ​ជាប់ទាក់​ទង​ជា​សាធារណៈ​ភ្នាក់​ងារ​ស៊ើប​ការណ៍​ឥណ្ឌា​ទៅ​នឹង​ឃាតកម្មលោក Hardeep Singh Nijjar ជនជាតិកាណាដា កាលពីខែមិថុនា។ ទីក្រុង​ញ៉ូវ​ដេលី បានច្រានចោលការចោទប្រកាន់នេះ ថាពុំសមហេតុផល។

លោក​ Nijjar ដែលបានគាំទ្រការបង្កើតរដ្ឋសាសនាស៊ីកផ្តាច់ខ្លួនចេញពីប្រទេសឥណ្ឌា ត្រូវបាន​អាជ្ញាធរ​ឥណ្ឌាតាម​ចាប់ខ្លួនលើបទចោទប្រកាន់ភេរវកម្ម និងការឃុបឃិតប្រព្រឹត្តឃាតកម្ម។

ប្រទេស​កាណាដាបានអំពាវនាវឲ្យប្រទេសឥណ្ឌា សហការក្នុង​ការស៊ើប​អង្កេត​ករណី​ការ​ស្លាប់​របស់​លោក និងបានបណ្តេញចេញអ្នកការទូតឥណ្ឌាម្នាក់។ ទីក្រុងញ៉ូវដេលី បានបញ្ចេញកំហឹង និង​មាន​ប្រតិកម្ម ដោយចាត់វិធានការប្រឆាំងតបត រួមមានទាំង​ការ​បិទ​សេវា​ផ្តល់​ទិដ្ឋាការ​សម្រាប់​ពលរដ្ឋ​កាណាដា។

ស្នងការជាន់ខ្ពស់ឥណ្ឌា បាននិយាយនៅក្នុងសេចក្តីថ្លែងការណ៍ថា បន្ទាប់ពីការ​ពិនិត្យ​ឡើង​វិញ​ស្ថាន​ភាព​សន្តិសុខដែលបានលើកយកមកពិចារណា នូវវិធានការរបស់​កាណាដា​កាល​ពី​ពេល​ថ្មីៗ​ទាក់​ទង​ទៅនឹ​ងបញ្ហានេះ ខ្លួនបានសម្រេច​ថា​បន្ត​សេវា​ផ្តល់​ទិដ្ឋាការ​ឡើង​វិញ​ដល់​ពលរដ្ឋ​កាណាដា៕