នគរបាលកំពុងស្វែងរកជនសង្ស័យម្នាក់បន្ទាប់ពីព្រឹត្តិការណ៍បាញ់ប្រហារសកម្ម ចំនួនពីរករណី នៅទីក្រុង Lewiston រដ្ឋ Maine កាលពីយប់ថ្ងៃពុធ។ នគរបាលប្រចាំរដ្ឋនេះ បានស្នើឱ្យអ្នកក្រុង Lewiston ស្នាក់នៅក្នុងផ្ទះ បន្ទាប់ពីម៉ោង៨ យប់។
យោងតាមប្រភពជាច្រើនពីអង្គភាពអនុវត្តច្បាប់ មនុស្សយ៉ាងហោចណាស់ ២២ នាក់បានស្លាប់នៅក្នុងការបាញ់ប្រហារជាច្រើនលើក នៅក្នុងទីក្រុង Lewiston រដ្ឋ Maine កាលពីយប់ថ្ងៃពុធ ។
ប្រភពទាំងនោះបានប្រាប់សារព័ត៌មាន CNN ថាមនុស្សពី ៥០ ទៅ ៦០នាក់ បានរងរបួសនៅក្នុងឧបទ្ទវហេតុនេះ ទោះបីជាមិនច្បាស់ថាមានមនុស្សប៉ុន្មាននាក់បានរងរបួសដោយសារការបាញ់ដោយកាំភ្លើងយ៉ាងណាក្ដី។
យោងតាមការិយាល័យនគរបាលតំបន់អានដ្រូស្កូជីន(Androscoggin)ជនសង្ស័យម្នាក់នៅតែបន្តរត់គេចខ្លួននៅឡើយ ។ ការិយាល័យនគរបាលបានចែករំលែករូបថតជនសង្ស័យប្រដាប់ដោយកាំភ្លើងចូលក្នុងទីលានលេងប៊ូលីង។
នគរបាលកំពុងស៊ើបអង្កេតនៅទីតាំងជាច្រើននៅក្នុងទីក្រុងនេះ។
សារព័ត៌មាន The Sun Journal បានរាយការណ៍ថានគរបាល និងក្រុមសង្គ្រោះ បានឆ្លើយតបរបាយការណ៍នៃការបាញ់ប្រហារនៅចំណុច Sparetime Recreation លើផ្លូវ Mollison Way និង ក្លឹបកម្សាន្ត ឆេម៉េនជីស បារ និងគ្រីល (Schemengees Bar and Grille) នៅផ្លូវលីនខូន(Lincoln) ។
នគរបាលប្រចាំរដ្ឋ ម៉េន (Maine ) ណែនាំអ្នកស្រុក សូមឲ្យស្នាក់នៅក្នុងផ្ទះរបស់អ្នកដោយបិទទ្វារ៕