ភ្នំពេញ៖ រដ្ឋមន្ត្រីក្រសួងមុខងារសាធារណៈ និងជាប្រធានក្រុម ប្រឹក្សាសាលាភូមិន្ទរដ្ឋបាល ឯកឧត្តម ហ៊ុន ម៉ានី បាន​អញ្ជើញ​ជា​អធិបតីភាព​ក្នុង​ពិធី​បិទវគ្គ​ប្រគល់​វិញ្ញាបនបត្រ​ជូន​សិក្ខាកាម​មន្ត្រី​ជាន់​ខ្ពស់ជំនាន់ទី១ និងបើកវគ្គបណ្តុះ បណ្តាលតម្រង់ទិសដំបូងមន្ត្រីគ្រប់គ្រងរដ្ឋបាល ក្រប​ខណ្ឌ​ថ្មី ឆ្នាំ២០២៣ នៃក្រសួងអប់រំ យុវជន និងកីឡា នៅសា លាភូមិន្ទរដ្ឋបាលនាថៃ្ងព្រហស្បតិ៍ ទី២៦ ខែតុលា ឆ្នាំ ២០២៣នេះ។ 

ពិធីនេះមានការចូលរួមផងដែរពីសំណាក់ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋ​លេខា​ធិការ​តំណាង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង​កីឡា ។ ឯកឧត្តម យក់ ប៊ុនណា រដ្ឋលេខាធិការ​ប្រចាំ​ការ​ នៃ​ក្រសួង​មុខងារ​សាធារណៈ និង​ជានាយកសាលាភូមិន្ទរដ្ឋបាលថ្នាក់ដឹកនាំមន្ត្រីរាជការ សិក្ខាកាមមន្ត្រីជាន់ខ្ពស់ និង​សិស្សមន្ត្រីគ្រប់គ្រងរដ្ឋបាលក្របខណ្ឌថ្មីឆ្នាំ២០២៣នេះជាច្រើននាក់។

ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជា​នាយក​សាលា​ភូមិន្ទរដ្ឋបាលបានប្រសាសន៍បញ្ជាក់ថា  ក្នុងនាមជាប្រតិបត្តិករ​ផ្នែក​អភិវឌ្ឍ​ធនធាន​មនុស្ស​របស់​រាជរដ្ឋាភិបាល សាលាភូមិន្ទរដ្ឋបាលបានបំពេញ មុខងារជា​ចម្បង​លើ​ការ​រៀបចំ​វគ្គ​បណ្តុះ​បណ្តាល​ដំបូង វគ្គបណ្តុះបណ្តាលបន្ត និងវគ្គបណ្តុះ បណ្តាលកិច្ចសហការ ជាមួយក្រសួង-ស្ថាប័ន​ថ្នាក់ជាតិ រដ្ឋបាលថ្នាក់ក្រោមជាតិ គ្រឹះស្ថានបណ្តុះបណ្តាលជាតិនិងអន្តរជាតិ និង ជាមួយ​ដៃគូ​អភិវឌ្ឍន៍នានា។

 ឯកឧត្តម យក់ ប៊ុនណា បញ្ជាក់បន្តថា ក្នុងក្រប​ខណ្ឌ​គាំទ្រ​ការ​អភិវឌ្ឍ​ធនធាន​មនុស្ស​របស់​ក្រសួង​អប់រំ យុវជន និង កីឡា សាលាភូមិន្ទរដ្ឋបាលបានរៀបចំវគ្គបណ្តុះបណ្តាល ទស្សន​កិច្ច​សិក្សា​ និងការជ្រើសរើស ដោយនៅឆ្នាំ២០២២ សាលាបាន​រៀបចំ​វគ្គ​បណ្តុះ​បណ្តាល​មន្ត្រី​ជាន់​ខ្ពស់​ក្រសួង​អប់រំ យុវជន និងកីឡា ជំនាន់ទី១ ឆ្នាំ២០២២ សរុបចំនួន ៩២ នាក់ក្នុងនោះ​ស្រី​ចំនួន​១៥​នាក់​ ដែលមានតំណែងថ្នាក់អគ្គនាយក និងថ្នាក់អនុប្រធាននាយកដ្ឋានឡើង ដោយបាន ចាប់​ផ្តើម​ពី​ថ្ងៃ​ទី៣១ ខែតុលា ឆ្នាំ២០២២ និងបានបញ្ចប់នៅថ្ងៃទី៣ ខែ កុម្ភៈ ឆ្នាំ ២០២៣។ ជាសក្ខីភាព នៅវេលាព្រឹកថ្ងៃនេះ សាលាបាននិងកំពុងរៀបចំពិធីបិទវគ្គបណ្តុះ បណ្តាល និង​ប្រគល់​វិញ្ញាបន​បត្របញ្ជាក់ការសិក្សាជូនសិក្ខាកាមដែលបានទទួលលទ្ធផលជោគជ័យ ចំនួន ៥៤ នាក់​ក្នុងនោះស្រី១០នាក់។

  ឯកឧត្តម​បាន​បន្តថា បន្ថែមពីនេះ សាលាបានសហការ រៀបចំការប្រឡងប្រជែង​ជ្រើស​រើស​មន្ត្រី​រដ្ឋបាល​ទូទៅ (ក្របខ័ណ្ឌជាមន្ត្រីគ្រប់គ្រងរដ្ឋបាល/ក្របខ័ណ្ឌ ក) សរុបចំនួន ១០០នាក់​ ក្នុង​នោះ​ស្រី​៣២​នាក់ សម្រាប់ក្របខណ្ឌថ្មី ឆ្នាំ២០២៣នេះ៕ អត្ថបទ ៖ ភារម្យ