នាយករដ្ឋមន្ត្រីអាមេនី បានថ្លែងប្រាប់សារព័ត៌មាន Wall Street Journal (WSJ) ក្នុង​បទ​សម្ភាស​មួយ​ដែលបានចេញផ្សាយកាលពីថ្ងៃពុធថា ប្រទេសអាមេនី មើលមិនឃើញ​ប្រយោជន៍​ក្នុង​ការ​បន្ត​ទីតាំងដល់ មូលដ្ឋានយោធារុស្ស៊ី នៅលើទឹកដីរបស់ខ្លួន បន្ទាប់ពីអាស៊ែរបៃហ្សង់ ដណ្តើម​យកតំបន់ជម្លោះណាហ្គ័រណូ- ការ៉ាបាក់មកគ្រប់គ្រងវិញ។

ប្រទេស​អាស៊ែរបៃហ្សង់ បានដណ្តើមយកតំបន់ណាហ្គ័រណូ-ការ៉ាបាក់ ដែលត្រូវបាន​អន្តរជាតិ​ចាត់​ទុក​ថា​ជាទឹកដីរបស់អាស៊ែរបៃហ្សង់ ប៉ុន្តែត្រូវបានគ្រប់គ្រងដោយជនជាតិអាមេនី ចាប់តាំង​ពី​ការ​ដួលរលំ នៃ​សហភាពសូវៀត ក្នុងទសវត្សរ៍ឆ្នាំ១៩៩០ នៅក្នុងប្រតិបត្តិការយោធាផ្លេកបន្ទោរមួយ កាលពីថ្ងៃទី២០ ខែកញ្ញា។

លោកនាយករដ្ឋមន្ត្រី នីកូល ប៉ាស៊ីនយ៉ាន (Nikol Pashinyan) បានថ្លែងប្រាប់សារព័ត៌មាន WSJ ថា៖ «ព្រឹត្តិការណ៍ទាំងនេះ បាននាំយើងទៅរកការសម្រេចចិត្ត ដែលយើង​ត្រូវ​ធ្វើ​ពិពិធកម្ម​ទំនាក់​ទំនង​របស់យើងនៅក្នុងវិស័យសន្តិសុខ ហើយយើងកំពុងព្យាយាមធ្វើវា ឥឡូវនេះ»។

វត្ត​មានយោធារបស់រុស្ស៊ីនៅអាមេនី រួមមានបន្ទាយយោធាស្ថិតក្នុងទីតាំងចំនួនពីរ និងមូល​ដ្ឋាន​ទ័ព​អា​កាសមួយ។ ទីក្រុងម៉ូស្គូ បានមើលឃើញខ្លួនឯងជាយូរមកហើយថា ជាអ្នកធានា​សន្តិសុខ​របស់​ប្រទេសអាមេនីនៅក្នុងតំបន់កូកាសខាងត្បូង (South Caucasus) ដែលងាយ​នឹង​មាន​គ្រោះ​ថ្នាក់ ជាតំបន់ដែលឆ្លងកាត់ដោយបំពង់បង្ហូរប្រេង និងឧស្ម័ន។