យោងតាមរបាយការណ៍ដែលចេញផ្សាយដោយស្ថាប័នពាណិជ្ជកម្មរបស់អង្គការសហប្រជាជាតិកាល​ពីថ្ងៃពុធ ២៥តុលា តំបន់ហ្កាហ្សា ត្រូវការប្រាក់​រាប់ពាន់​លាន​ដុល្លារ​ជាជំនួយ​សេដ្ឋកិច្ច​ពី​អន្តរជាតិ ដើម្បីទូទាត់សងសម្រាប់ការរឹតបន្តឹងជាច្រើនឆ្នាំដែលបានរារាំងសេដ្ឋកិច្ចរបស់ខ្លួន និង​ទប់​ស្កាត់​ការអភិវឌ្ឍន៍របស់ខ្លួន ។

នៅក្នុងរបាយការណ៍របស់ខ្លួន ស្តីពីការអភិវឌ្ឍន៍សេដ្ឋកិច្ច នៃដែនដីប៉ាឡេស្ទីន ត្រូវបានគ្រប់គ្រង​ដោយ​​អ៊ីស្រាអែលសម្រាប់ឆ្នាំ២០២២ សន្និសីទអង្គការសហប្រជាជាតិ ស្តីពីពាណិជ្ជកម្ម និង​ការ​អភិវឌ្ឍន៍ (UNCTAD) បានលើកឡើងពីស្ថានភាពសេដ្ឋកិច្ចដ៏ធ្ងន់ធ្ងរបំផុត នៅតំបន់ហ្កាហ្សា សូម្បីតែ​មុន​ពេលការវាយប្រហាររបស់អ៊ីស្រាអែលលើដែនដីរងការឡោមព័ទ្ធ ជាការ​សងសឹក​ចំពោះ​ការស្លាប់​ដ៏សាហាវកាលពីថ្ងៃទី ៧ ខែតុលា ដោយខ្មាន់កាំភ្លើង​ក្រុម​ហាម៉ាស​នៅ​ភាគ​ខាង​ត្បូង​អ៊ីស្រាអែល។ 

ថ្លែងទៅកាន់អ្នកសារព័ត៌មាននៅទីក្រុងហ្សឺណែវ លោក រីឆាត កូហ្ស៊ូលវ៉េត(Richard Kozul-Wright) នាយកផ្នែកសន្និសីទអង្គការសហប្រជាជាតិស្តីពីពាណិជ្ជកម្ម និងការ​អភិវឌ្ឍន៍ ស្តីពី​សកល​ភាវូបនីយកម្ម និងយុទ្ធសាស្រ្តអភិវឌ្ឍន៍ បាននិយាយថា មានការពិបាក​ក្នុង​ការ​វាយ​តម្លៃ​ឱ្យ​បាន​ពេញ​លេញ​ថា តើត្រូវការប្រាក់ប៉ុន្មានដើម្បីទប់ទល់នឹងសេដ្ឋកិច្ចនៅតំបន់ហ្កាហ្សា ដែលគ្រប់​គ្រង​ដោយ​ក្រុមសកម្មប្រយុទ្ធហាម៉ាស។          

របាយការណ៍បាននិយាយថា កាលពីឆ្នាំមុន ក្រុមអាជ្ញាធរប៉ាឡេស្ទីនបានទទួលត្រឹមតែ ២៥០ លាន​ដុល្លារ ជាថវិកាគាំទ្រពីម្ចាស់ជំនួយ និង ៣០០លានដុល្លារសម្រាប់គម្រោងអភិវឌ្ឍន៍នានា។

របាយការណ៍បាននិយាយថា ស្ទើរតែពាក់កណ្តាលនៃចំនួនប្រជាជននៅតំបន់ហ្កាហ្សា គ្មាន​ការងារ​ធ្វើហើយជាងពាក់កណ្តាលរស់នៅក្នុងភាពក្រីក្រ។ ទោះបីជាកម្មករនៅក្នុងតំបន់នេះ ត្រូវបាន​អនុញ្ញាត​ឱ្យ​ចូលទៅកាន់ទីផ្សារការងាររបស់អ៊ីស្រាអែលជាលើកដំបូងក្នុងប៉ុន្មានឆ្នាំថ្មីៗនេះក៏ដោយ ប៉ុន្តែចំនួន នៃការអនុញ្ញាតដែលបានចេញ ប្រហែល ១% នៃកម្មករដែល​មាន​ការងារ​ធ្វើ​នៅ​តំបន់​ហ្កាហ្សា គឺតិចតួចពេកក្នុងការទប់ទល់នឹងភាពក្រីក្រ៕