រាល់អាណាព្យាបាល ដែលមានកូនកើតបញ្ហា អូទីស្សឹម ត្រូវតែ​បញ្ជូន​ពួក​គេ​មក​សាលា​រៀន​អប់រំ​ពិសេស​ឱ្យ​បាន​លឿនបំផុត ខណៈកុមារអាយុ៣ឆ្នាំ ជាអាយុដែលអាច​ទទួល​បាន​ការ​បណ្ដុះ​បណ្ដាល​ទៅ​រកភាពប្រសើរបានលឿន។ នេះបើតាមការ​ណែនាំ​របស់​នាយក​វិទ្យាល័យ​អប់រំ​ពិសេស​ក្រុង​តាខ្មៅ។

លោក ចាន់ សារិន ជានាយកវិទ្យាល័យអប់រំពិសេសក្រុងតាខ្មៅ លើកឡើងថាអា ណាព្យាបាល គឺ​មាន​ភាពចាំបាច់ ត្រូវតាមដានស្ថានភាពកូន នៅចន្លោះ ២៤ខែ ទៅ៣៦ខែ ករណី​សង្ស័យ​កើត​អូទីស្សឹម​។ ការតាមដានដោយផ្អែកលើ រោគសញ្ញាព្រមានចំនួន ៧ និងរោគសញ្ញាធំៗចំនួន ៣ គឺ វិបត្តិ​ទំនាក់ទំនងសង្គម វិបត្តិភាសា និងវិបត្តអាកប្បកិរិយា។ លោកថា ករណី​រក​ឃើញ​សញ្ញា​ទាំង​នេះ អាណាព្យាបាលត្រូវនាំកូនទៅពិនិត្យជាមួយ គ្រូពេទ្យជំនាញលើបញ្ហា អូទីស្សឹម និ​ង​ត្រូវ​បញ្ជូន​កុមារអូទីស្សឹម នោះមកចូលសាលារៀនអប់រំពិសេសឱ្យបានលឿនបំផុត។ អាយុ​ដែល​ល្អ​បំផុត​ នោះគឺអាយុ ៣ឆ្នាំ ជាអាយុដែលអាចជួយឱ្យកុមារនោះមានភាពប្រសើរ បានឆាប់រហ័ស។

លោកបន្តថា ការបញ្ជូនកូនទៅសាលារៀននេះ គឺពុំមែនសំដៅលើសាលារៀនទូទៅ ដូច​កុមារ​ធម្មតា​នោះ​ទេ។ សាលារៀនគឺសំដៅលើ សាលារៀនអប់រំ​ពិសេស​ដែល​មាន​កម្ម​វិធី​អប់រំ​ពិសេស​សម្រាប់​កុមារ អូទីស្សឹម។ ជាក់ស្ដែងបច្ចុប្បន្ន វិទ្យាល័យអប់រំពិសេសក្រុងតាខ្មៅ ជាសាលារៀន​រដ្ឋ​តែ​មួយ​ប៉ុណ្ណោះ ដែលផ្ដល់ការសិក្សាសម្រាប់កុមារអូទីស្សឹម។ បច្ចុប្បន្ន មានកុមារអូទីស្សឹមជាង ២០០​នាក់​កំពុងសិក្សា និងមានកុមារអូទីស្សឹមជិត ២០០នាក់ កំពុងរង់ចាំការចូលសិក្សាផងដែរ។ ការ​រង់ចាំដោយសារ បញ្ហាខ្វះបន្ទប់សិក្សា និងខ្វគ្រូជំនាញ។ នេះជាការបញ្ជាក់ថែម របស់​លោក​នាយក​។

សម្រាប់ការបង្រៀន កុមារអូទីស្សឹមនៅវិទ្យាល័យអប់រំពិសេសក្រុងតាខ្មៅ គឺមាន​ការ​កំណត់​ស្តង់ដា​ចំនួន​សិស្ស​ច្បាស់លាស់សម្រាប់ការបង្រៀនថ្នាក់នីមួយៗ។ លោកនាយកលើកឡើងថា ផ្អែកលើ​ក្រសួង​អប់រំ យុវជន និងកីឡា ចំនួនសិស្សអាចមានភាពជាក់ស្ដែងតាមស្ថានភាពរបស់សិស្ស ដោយ​មួយ​ថ្នាក់រៀនយ៉ាងច្រើនបំផុតគឺសិស្សចំនួន ១០នាក់ ក្រោមការគ្រប់​គ្រង​ទទួល​ខុស​ត្រូវ​របស់គ្រូបង្រៀនចំនួន ២នាក់។ បច្ចុប្បន្នសាលា ក៏មានថ្នាក់ខ្លះបង្រៀនសិស្សតែ ២នាក់ និង​មាន​ថ្នាក់​អន្តរគមន៍បន្ទាន់ ដែលមួយថ្នាក់មានសិស្សតែ មួយនាក់ប៉ុណ្ណោះ៕ អត្ថបទ៖ គឹមហុក