បុរសមានវ័យជិត ៧០ ឆ្នាំម្នាក់ឈ្មោះ សែម ដឹម រស់នៅភូមិទួលលៀប សង្កាត់ស្នោ ខណ្ឌ​ពោធិ៍សែនជ័យ រាជធានីភ្នំពេញ មានអាការភ្នែកស្រវាំង មើលមិនឃើញ ដោយសារ​ជំងឺទឹក​នោម​ផ្អែម​ ដែលបណ្តាលឱ្យមានបញ្ហាហូរឈាមបាតភ្នែក និងរបើកសរសៃបាតភ្នែក ហើយ​ពុំ​មាន​លទ្ធភាព​ព្យាបាលព្រោះមានជីវភាពខ្វះខាត។

ដោយក្តីសប្បុរសដ៏ខ្ពង់ខ្ពស់ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និង​លោក​ជំទាវបណ្ឌិត ពេជ ចន្ទមុន្នី ហ៊ុនម៉ាណែត, សម្ដេចធិបតី និងលោកជំទាវ បានចាត់​ក្រុម​គ្រូពេទ្យ​ស្ម័គ្រចិត្ត​យុវជនសម្តេចតេជោ ហៅកាត់ TYDA ជួយព្យាបាល​ភ្នែក​ទាំងសង​ខាង​របស់​គាត់​នៅ​មន្ទីរ​ពេទ្យព្រះអង្គឌួង កាលពីថ្ងៃទី២៣ ខែតុលា ឆ្នាំ២០២៣ បានដោយជោគជ័យ។

បច្ចុប្បន្នភ្នែករបស់បុរសវ័យជិត ៧០ ឆ្នាំរូបនេះ អាចមើលឃើញសាជាថ្មីឡើងវិញ ជាមួយ​នឹង​អារម្មណ៍​រំភើបរីករាយ ព្រមទាំងគោរពអរគុណចំពោះសម្តេចធិបតី និងលោក​ជំទាវ​បណ្ឌិត​ជា​អនេក​។

សូមបញ្ជាក់ផងដែរថា រាល់ការចំណាយទាំងអស់ទាំងក្នុងការព្យាបាល វះកាត់ ស្នាក់នៅ និង​ហូប​ចុក របស់អ្នកជំងឺរូបនេះ ត្រូវបានឧបត្ថម្ភទំនុកបម្រុងទាំងស្រុងពីសម្តេចមហាបវរធិបតី ហ៊ុន ម៉ាណែត និងលោកជំទាវបណិ្ឌត ពេជ ចន្ទមុន្នី ហ៊ុនម៉ាណែត៕ ដោយ៖ គង់ ឌិន