អ៊ីស្រាអែល៖ លោកនាយក​រដ្ឋមន្ត្រី​អ៊ីស្រាអែល Benjamin Netanyahu បាន​ថ្កោលទោស​រាល់​ការ​ញុះញង់ និង​អំពើ​ហិង្សា​កាលពី​ថ្ងៃអាទិត្យ​ ក្រោយ​ការ​តវ៉ា​ដ៏​ក្ដៅ​គគុក​ទូទាំង​ប្រទេស​។ កាលពី​ថ្ងៃ​ពុធ មេដឹកនាំ​បក្ស​ប្រឆាំង​លោក Yair Lapid និង​ដៃគូ​បក្ស​ចម្រុះ​សំខាន់​របស់​លោក គឺ​លោក Naftali Bennett បាន​ប្រកាស​ថា ​ពួក​គេ​បាន​ឈាន​ដល់​កិច្ចព្រមព្រៀង​មួយ​ ក្នុង​ការ​ការ​បង្កើត​រដ្ឋាភិបាល​ចម្រុះ​មានការ​ចូលរួម​ពី ​៨​គណបក្ស​ពី​គ្រប់​ទិដ្ឋភាព​នយោបាយ។

លោក Netanyahu ដែល​កំពុង​តតាំង​ការរស់នៅ​នៃ​ជីវិត​នយោបាយ​របស់​លោក បាន​ព្រមាន​ប្រឆាំង​នឹង​បក្ស​ចម្រុះ​ថ្មី ខណៈ​ដែល​លោក​កំពុង​ថ្លែង​នៅ​ឯ​កិច្ចប្រជុំ​បក្ស Likud នៅ​សភា។​ លោក Netanyahu បាន​និយាយ​កាលពី​ថ្ងៃអាទិត្យ​ថា លោក​សូម​សន្យា​ថា​ យើង​ទាំង​អស់​គ្នា មិត្តភ័ក្ដិ​របស់​លោក និង​រូបលោក​នៅ​ក្នុង​បក្ស Likud នឹង​ប្រឆាំង​ដាច់ខាត​ចំពោះ​ការ​បង្កើត​រដ្ឋាភិបាល​កើត​ចេញ​ពី​ការ​លួច​បន្លំ​។ លោក​បាន​បន្ថែម​ថា ​ប្រសិនបើ​រដ្ឋាភិបាល​នោះ​ត្រូវ​បាន​បង្កើត​មែន​នោះ ពួក​លោក​នឹង​កម្ទេច​ចោល​ភ្លាម​។​ ក្រុមចម្រុះ​មាន​សំឡេង​ភាគច្រើន​ស្ដួចស្ដើង​បំផុត​គឺ ៦១​អាសនៈ​នៅ​ក្នុង​សភា​៕

អត្ថបទ៖ សុខមាន