បាត់ដំបង៖ ប្រជាពលរដ្ឋមានជីវភាពខ្វះខាតរងគ្រោះ ដោយជំនន់ទឹកភ្លៀងជាង ១ពាន់គ្រួសារ នៅតាមបណ្ដា​ក្រុងស្រុកចំនួន ៧ នៃខេត្តបាត់ដំបង ទទួលបានអំណោយ​មនុស្សធម៌​ពី​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។

ក្នុងឱកាសនាំយកអំណោយចែកជូនដល់ប្រជាពលរដ្ឋរងគ្រោះនាថ្ងៃទី២៤ ខែតុលា ឆ្នាំ២០២៣​នេះ ​លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានពាំនាំមកនូវព្រះរាជបន្ទូល និង​ប្រសាសន៍​ផ្តាំ​ផ្ញើសួរសុខទុក្ខរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងហ្លួងម៉ែ នរោត្តម មុនិនាថ សីហនុ ព្រះវររាជ​មាតា​ជាតិ​ខ្មែរ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្តីនឹករលឹក និងមនោសញ្ចេត​នា​ជាប់​ជានិច្ច​ជាមួយប្រជានុរាស្ត្រកូនចៅ និងប្រជាពលរដ្ឋគ្រប់ពេលវេលា។

លោកជំទាវអគ្គលេខាធិការ បានណែនាំ​ដល់​បងប្អូន​ប្រជាពលរដ្ឋ​ត្រូវ​សម្អាត​អនាម័យ​បរិស្ថាន​ជុំវិញ​ផ្ទះ ​ដោយកុំចាត់ជម្រកមូសមានដូចជា សំបកដូង សំបងកង់ កង់ម៉ូតូ កង់ឡាន ឬវត្ថុ​ដែល​អាច​ដក់​ទឹក​បាន​ ដើម្បីទប់ស្កាត់ជំងឺគ្រុនឈាម គ្រុនឈីក និងហ្ស៊ីកាជាដើម ខណៈជំងឺ​គ្រុន​ឈាម​ឆ្លង​លើ​មនុស្ស​គ្រប់​វ័យ។

លោកជំទាវ បានក្រើនរំលឹក​ដល់​ស្ត្រីដែល​មាន​ផ្ទៃ​ពោះ​សូម​ទៅ​ពិនិត្យ​សុខ​ភាព​យ៉ាងតិច​ ៤ដង​មុន​សម្រាល​ជា​ពិសេស​ត្រូវ​ទៅ​សម្រាល​កូន​នៅ​មណ្ឌល​សុខ​ភាព​ព្រោះ​នៅ​ទី​នោះ​មានឆ្មប​ជំនាញ​ដែល​វិជ្ជា​ជី​វៈច្បាស់លាស់ ហើយស្ត្រីដែល​ទើប​សម្រាល​កូន​រហូត​ដល់​កុមា​រ​មាន​អាយុដល់​២​ឆ្នាំ​សូម​ទៅ​ទទួល​វ៉ាក់សាំងឲ្យបានគ្រប់ចំនួនដែលក្រសួងសុខាភិបាលបានកំណត់។

លោកជំទាវ លើកឡើងបន្ថែមថា សម្រាប់ការងារបរិស្ថាន សម្តេចកិត្តិព្រឹទ្ធ​បណ្ឌិត​ប្រធាន​គឺ​យក​ចិត្ត​ទុក​ដាក់​ខ្លាំង​ណាស់ ហើយជានិច្ចកាល កាកបាទក្រហមកម្ពុជា មានអ្នកស្ម័គ្រចិត្ត និងយុវជន​កាក​បាទ​ក្រហមកម្ពុជា តែងតែមានសកម្មភាពដាំដើមឈើជារៀងរាល់ឆ្នាំ ហើយថ្មីៗនេះ កាកបាទ​ក្រហម​កម្ពុជា បានចុះអនុស្សរណៈយោគយល់ជាមួយក្រសួងបរិស្ថាន ក្នុងយុទ្ធនាការ​កាត់​បន្ថយ​ការ​ប្រើប្រាស់​ប្លាស្ទិក ក្រោមប្រធានបទ "ថ្ងៃនេះ ខ្ញុំមិនប្រើថង់ប្លាស្ទិកទេ" ហេតុដូចនេះ លោក​ជំទាវ​អគ្គលេខាធិការ បានសំណូមពរដល់បងប្អូនប្រជាពលរដ្ឋទាំងអស់ជាការចាប់ផ្តើមដំបូង សូម​កុំ​ប្រើប្រាស់ថង់ប្លាស្ទិក១ថ្ងៃក្នុងមួយសប្តាហ៍។

លោកជំទាវអគ្គលេខាធិការ បានថ្លែងអំណរគុណយ៉ាងជ្រាលជ្រៅចំពោះ ថ្នាក់ដឹកនាំ​សាខា​កាកបាទ​ក្រហមកម្ពុជា និងថ្នាក់ដឹកនាំគ្រប់លំដាប់ថ្នាក់ក្នុងខេត្តបាត់ដំបង ដែលបាន​យក​ចិត្ត​ទុក្ខ​ដាក់​ និងបានចុះពិនិត្យស្ថានភាពទឹកទំនន់ និងស្នើសុំជំនួយពីសម្តេចកិត្តិព្រឹទ្ធបណ្ឌិតប្រធាន ដើម្បី​ជួយ​ដល់ប្រជាពលរដ្ឋរងគ្រោះបានទាន់ពេលវេលា។

ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង តំណាង​ឱ្យ​ប្រជាពលរដ្ឋដែលរងគ្រោះទាំងអស់ សូមថ្លែងអំណរគុណយ៉ាងជ្រាលជ្រៅបំផុតចំពោះ សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធានកាក​បាទ​ក្រហម​កម្ពុជា​ដែល​បាន​យក​ចិត្ត​ទុកដាក់ និង​ជួយ​សម្រាល​ការលំបាកដល់ប្រជាពលរដ្ឋដែលរងគ្រោះដោយជំនន់ទឹកភ្លៀង៕