ភ្នំពេញ ៖ លោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានទទួលសន្ទនាការងារជាមួយលោក David Verbiwski ភារធារីតំណាងការិយាល័យស្ថានទូតកាណាដា ប្រចាំកម្ពុជា នាព្រឹកថ្ងៃទី២៦ ខែតុលា ឆ្នាំ២០២៣នេះ នៅទីសី្តការក្រសួង។

​សូមរំលឹកថា៖ កម្ពុជា-កាណាដា នាពេលកន្លងមក មានសកម្មភាពជាច្រើនលើវិស័យសិល្បៈវប្បធម៌ ដោយធ្វើកិច្ចសហប្រតិបតិ្តការ និងការផ្លាស់ប្តូរជាមួយកម្ពុជា។ ដោយហេតុថា កាណាដា ប្រើប្រាស់ភាសាបារាំង និងអង់គ្លេស ដូចនេះគឺឋិតក្នុងក្របខ័ណ្ឌអង្គការអន្តរជាតិហ្វ្រង់កូហ្វូនី។ ទន្ទឹមនឹងនោះក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា ក៏បានបញ្ជូនក្រុមសិល្បៈ រួមមាន៖ វិចិត្រករ និងផលិតករភាពយន្ត ជាដើម ទៅទស្សនកិច្ច និងសម្តែងសិល្បៈជាច្រើនលើក ក្នុងប្រទេសកាណាដា និងការងារផ្សេងទៀត ខាងផ្នែកសារមនី្ទរ ក៏មន្រី្តជំនាញកម្ពុជា ធ្លាប់បានធ្វើការជាមួយកាណាដាផងដែរ។ ថ្វីត្បិតថាជាប្រទេសមួយ ដែលមានស្ថានភាព នៅឆ្ងាយពីគ្នាមែន ប៉ុន្តែគ្រប់សកម្មភាពនៃកិច្ចសហប្រតិបតិ្តការរវាងប្រទេសទាំងពីរ លើវិស័យវប្បធម៌ គឺមានច្រើន។

ក្នុងជំនួបពិភាក្សាការងារនេះ ភាគីទាំងពីរ មានចេតនាបង្កើនកិច្ចសហប្រតិបតិ្តការឲ្យកាន់តែលូតលាស់ជាបន្តទៀត។ ជាមួយគ្នានោះដែរលោក David Verbiwski គ្រោងរៀបចំចងក្រងនូវឯកសារផ្សេងៗ ដែលជាសក្តានុពលលើវិស័យវប្បធម៌ ដែលអាចចូលរួមសហប្រតិបត្តិការជាមួយគ្នារវាងកាណាដា និងកម្ពុជា ជាពិសេសលើការងារសារមនី្ទរ ដោយមានបំណងផ្លាស់ប្តូរ និងតាំងពិព័រណ៌វត្ថុបុរាណផ្សេងៗ។

ក្នុងក្របខ័ណ្ឌអង្គការអន្តរជាតិហ្វ្រង់កូហ្វូនី ផ្តោតសំខាន់លើសាកលវិទ្យាល័យ គឺលោកជំទាវ បណ្ឌិតសភាចារ្យ ភឿង សកុណា បានស្នើឲ្យលោក David Verbiwski ធ្វើកិច្ចសហប្រតិបតិ្តការរវាងសាកលវិទ្យាល័យភូមិន្ទវិចិត្រសិល្បៈកម្ពុជា ជាមួយនិងសាកលវិទ្យាល័យកាណាដា ដោយផ្តោតសំខាន់លើកិច្ចការស្ថាបត្យកម្ម សាងសង់អាគារថ្មី តាមរចនាបថសំណង់បែបបុរាណ។ ព្រោះថាកម្ពុជា មានការអភិវឌ្ឍច្រើន ការសាងសង់សំណង់អាគារថ្មីៗ ក៏មានច្រើន ដូចនេះក្រសួងវប្បធម៌ និងវិចិត្រសិល្បៈ កំពុងយកចិត្តទុកដាក់ និងគិតគូរលើផ្នែកសំណង់ស្ថាបត្យកម្ម ក៏ជាចំនុចមួយដ៏សំខាន់ ដើម្បីឲ្យការរីកចម្រើនក្នុងទីក្រុង ធ្វើយ៉ាងណាឲ្យសំណង់ស្ថាបត្យកម្ម រីកលូតលាស់ឡើងមានលក្ខណៈវប្បធម៌ និងលក្ខណៈទំនើបជឿនលឿនផងដែរ។

ជាការឆ្លើយតប លោក David Verbiwski សូមស្វាគមន៍នូវអ្វីដែលលោកជំទាវរដ្ឋមន្រី្ត បានលើកឡើង ក្នុងនោះលោកនឹងឲ្យក្រុមការងារមកធ្វើការជាមួយផ្នែកជំនាញផ្ទាល់ ៕ អត្ថបទ៖ រដ្ឋា​