​ប្រណាំង​រថយន្ត៖ ​កីឡាករ​ម៉ិ​ក​ស៊ិ​ក Sergio Perez របស់​ក្រុម Red Bull បាន​យកឈ្នះ​ការប្រកួត​នៅ​ទីលាន​ទីក្រុង Baku ប្រទេសអា​ស៊ែ​បៃ​សង់ បន្ទាប់ពី​មិត្ត​រួម​ក្រុម Max Verstappen ជួបនឹង​គ្រោះថ្នាក់ ​ស្រប​ពេលដែល​ជើងឯក ៧សម័យ Lewis Hamilton មាន​កំហុស​បច្ចេកទេស​។

​​កីឡាករ​ហូ​ឡង់ Max Verstappen បាន​ដណ្តើម​ការនាំ​មុខ​ពី Charles LeClerc ដែល​ឈ្នះ​ការប្រកួត​យក​ទី​ចេញដំណើរ​កាលពី​ថ្ងៃ​សៅរ៍ និង​បាន​នាំមុខ​រហូត​ស្ទើ​ចប់​ការប្រកួត​ទៅហើយ​ តែ​បាន​រអិល​ចង្កូត​បុក​នឹង​ជញ្ជាំង​នៅពេល​សល់ ៥ជុំ​ទៀត​ចប់​ការប្រកួត​។ ​ដោយមាន​បំណែក​នៅលើ​ទីលាន​ច្រើន កីឡាករ​ទាំងអស់​ត្រូវ​ផ្អាក​ដោយ​ទង់​ក្រហម មុន​ពេលដែល​ចាប់ផ្តើម​បន្ត​ដោយ Lewis Hamilton ជ្រុល​ល្បឿន​នៅ​ផ្លូវបត់​ទីមួយ និង​ធ្លាក់​ដល់​លេខ ១៥​។ ​​កំហុស​បច្ចេកទេស​ផ្ទាល់ខ្លួន​នេះ​ធ្វើអោយ Sergio Perez ក្លាយជា​អ្នក​នាំមុខគេ​រហូត​ដល់ទី​ព្រ័ត្រ​ឈ្នះ​ការប្រកួត​លើកដំបូង​តាំងពី​ផ្ទេរ​មក Red Bull​។

​​ជាមួយគ្នា​នោះដែរ​ជើងឯក​ពិភពលោក ៤សម័យ Sebastian Vettel ទទួលបាន​ចំណាត់ថ្នាក់​លេខ២ អោយ​ក្រុម​ថ្មី Aston Martin និង​លេខ៣ កីឡាករ​បារាំង Pierre Gasly របស់​ក្រុម Alpha Tauri​។​ ​​យោងតាម​លទ្ធផល​នេះ​តារាង​ជើងឯក​ពិភពលោក​លេខ១ និង​លេខ២ មិន​ប្រែប្រួល​ឡើយ​ដោយ Max Verstappen បន្ត​នាំមុខ Lewis Hamilton ៤ពិន្ទុ​ដដែល​។ ​ទីលាន​បន្ទាប់ពី​អា​ស៊ែ​បៃ​សង់​នេះ​គឺ​នៅ​ប្រទេស​បារាំង​ថ្ងៃទី២០ ខែមិថុនា​នេះ​៕

​អត្ថបទ​៖​នាង សុភា​វុ​ធ