ប្រធានាធិបតីអាមេរិកលោក Joe Biden និងនាយករដ្ឋមន្ត្រីអូស្ត្រាលីលោក Anthony Albanese បានព្រមព្រៀងគ្នា ក្នុងការលើកកម្ពស់កិច្ចសហប្រតិបត្តិការផ្នែកសន្តិសុខ រវាងប្រទេសទាំង២ រួមជាមួយនឹងប្រទេសជប៉ុន នៅក្នុងតំបន់ឥណ្ឌូ-ប៉ាស៊ីហ្វិក ដោយសម្លឹងមើលវត្តមាននៃឥទ្ធិពលរបស់ប្រទេសចិន ដែលកំពុងតែកើនឡើងជាលំដាប់។

មេដឹកនាំទាំង២ បានជួបពិភាក្សាគ្នា នៅទីក្រុងវ៉ាស៊ីនតោន កាលពីថ្ងៃពុធ (ទី២៥ ខែតុលា) ហើយសេចក្តីថ្លែងការណ៍រួម ដែលបានចេញផ្សាយបន្ទាប់ពីជំនួបនោះ បានប្រកាសពីគោលបំណងរបស់ប្រទេសទាំង២ ក្នុងការស្វែងរកកិច្ចសហប្រតិបត្តិការត្រីភាគីជាមួយជប៉ុនលើប្រព័ន្ធការពារដែនអាកាសគ្មានមនុស្សបញ្ជា។ សេចក្ដីថ្លែងការណ៍នោះ ក៏បានកត់សម្គាល់ពីវឌ្ឍនភាពនៃការទិញនាវាមុជទឹកដើរដោយថាមពលនុយក្លេអ៊ែររបស់ប្រទេសអូស្ត្រាលីផងដែរ។

មេដឹកនាំទាំង២ បានបញ្ជាក់ថា ខ្លួននឹងធ្វើការជាមួយគ្នា ដើម្បីផ្តល់ហិរញ្ញប្បទានដល់ការតភ្ជាប់ខ្សែកាបក្រោមបាតសមុទ្រនាពេលអនាគត សម្រាប់ប្រជាជាតិកោះប៉ាស៊ីហ្វិក ហើយក្នុងពេលជាមួយគ្នា ក៏បានយល់ព្រមលើការសហការ ដើម្បីណែនាំនូវការប្រើប្រាស់ថាមពលកកើតឡើងវិញ ដើម្បីដោះស្រាយបម្រែបម្រួលអាកាសធាតុ។

លើសពីនេះទៀត សេចក្តីថ្លែងការណ៍ក៏បានថ្កោលទោសយ៉ាងខ្លាំងក្លាដល់ការវាយប្រហាររបស់ក្រុមហាម៉ាសលើអ៊ីស្រាអែល ហើយក៏បានអំពាវនាវផងដែរឲ្យមានការការពារជនស៊ីវិល និងការផ្តល់ជំនួយមនុស្សធម៌ដល់អ្នកដែលត្រូវការជំនួយ នៅក្នុងតំបន់ហ្គាហ្សា៕