ប្រធានាធិបតីបារាំង លោក Emmanuel Macron បានលើកឡើង កាលពីថ្ងៃពុធ (ទី២៥ ខែតុលា) ថា ការលុកលុយផ្លូវគោករបស់អ៊ីស្រាអែល «ក្នុងទ្រង់ទ្រាយធំ» ចំពោះតំបន់ហ្គាហ្សា នឹងក្លាយជា «កំហុសឆ្គង» ដោយបានព្រមានថា ការវាយលុកនោះនឹងធ្វើឲ្យប៉ះពាល់ដល់ជនស៊ីវិល ដែលមិនធានាឲ្យមានសន្តិសុខរយៈពេលវែងនោះឡើយ សម្រាប់អ៊ីស្រាអែល។

ការព្រមាននេះបានកើតឡើងនៅពេលដែលលោក Macron ធ្វើការពិភាក្សានៅទីក្រុងគែរជាមួយសមភាគីអេហ្ស៊ីបលោក Abdel Fattah al-Sisi ដែលបានជំរុញផងដែរឲ្យមានកិច្ចប្រឹងប្រែង «ដើម្បីបញ្ចៀសការលុកលុយផ្លូវគោក» នៅតំបន់ហ្គាហ្សា ជាកន្លែងដែលអ៊ីស្រាអែល ជាប់នៅក្នុងការប្រឈមមុខដាក់គ្នាយ៉ាងខ្លាំងក្លាជាមួយក្រុមសកម្មប្រយុទ្ធហាម៉ាស។

ក្រុមមន្ត្រីបានឲ្យដឹងថា អ៊ីស្រាអែលបាននិងកំពុងទម្លាក់គ្រាប់បែកលើដែនដីដ៏តូចរបស់ប៉ាឡេស្ទីន ចាប់តាំងពីថ្ងៃទី៧ ខែតុលា នៅពេលដែលខ្មាន់កាំភ្លើងក្រុមហាម៉ាស បានឆ្លងកាត់ព្រំដែនរបស់ខ្លួន ហើយបានបាញ់ប្រហារសម្លាប់មនុស្សជាង ១.៤០០នាក់ ដែលភាគច្រើនជាជនស៊ីវិល និងបានចាប់មនុស្សជាង ២២០នាក់ផ្សេងទៀត ដែលនេះជាការវាយប្រហារដ៏អាក្រក់បំផុតក្នុងប្រវត្តិសាស្ត្ររបស់អ៊ីស្រាអែល។

ចំណែកមន្ត្រីរបស់ក្រុមហាម៉ាសវិញ និយាយថា រហូតមកដល់ពេលនេះ ការវាយប្រហាររបស់អ៊ីស្រាអែលបានសម្លាប់ប្រជាជនប៉ាឡេស្ទីនជាង ៦.៥០០នាក់ ដែលភាគច្រើនជាជនស៊ីវិល។

យ៉ាងណាក្ដី បន្ទាប់ពីជួបជាមួយលោក Sisi ដែលបានព្រមានថា ប្រតិបត្តិការផ្លូវគោក នឹងបង្កឲ្យ «ជនស៊ីវិលបាត់បង់ជីវិតច្រើនជាមិនខាននោះ» លោក Macron បាននិយាយថា «អន្តរាគមន៍ ក្នុងទ្រង់ទ្រាយធំ ដែលនឹងធ្វើឲ្យជីវិតជនស៊ីវិលប្រឈមនឹងហានិភ័យ» នោះ នឹងក្លាយជាកំហុសឆ្គងមួយ។ មេដឹកនាំបារាំងបានសង្កត់ធ្ងន់ថា៖ «វាក៏ក្លាយជាកំហុសមួយផងដែរសម្រាប់អ៊ីស្រាអែល ព្រោះប្រតិបត្តិការនោះ ទំនងជាមិនផ្តល់ការការពាររយៈពេលវែង និងដោយសារតែវាមិនស៊ីគ្នានឹងការការពារប្រជាជនស៊ីវិល ឬការគោរពច្បាប់មនុស្សធម៌អន្តរជាតិ និងច្បាប់នៃសង្រ្គាមឡើយ»៕